آسٹریلیا میں بکری کے معذور بچے کیلئے وہیل چیئر تیار

  میلبورن .....آسٹریلیا میں بکری کے معذور بچے (میمنے ) کیلئے وہیل چیئر بنا لی گئی جس کے بعد اب وہ کچھ دقت سے ہی مگر چلنے پھرنے کے قابل ہوگیا ہے۔آسٹریلیا کے ایک نجی جانوروں کی دیکھ بھال کرنے والے ادارے کی جانب سے بنائی جانے والی یہ وہیل چیئر اس معصوم بچے کےلئے نئی زندگی ثابت ہوئی۔ فروسٹی دی سنو گوٹ نامی یہ بکری کا بچہ جانوروں کی ایک جوائنٹ ال نامی بیماری کا شکار تھا جس کے باعث جوڑ سوج جاتے ہیں اور حرکت کے قابل نہیں رہتے۔ فروسٹی کے پچھلے دونوں پاو¿ں اس بیماری کا شکار تھے جس کے باعث وہ چلنے پھرنے سے قاصر تھا۔ ادارے کے مطابق جب یہ بچہ انہیں ملا اس وقت یہ کیڑوں سے بھرا ہوا اور پیاسا تھا کیونکہ یہ حرکت نہیں کرسکتا تھا۔ انہوں نے اس کی دیکھ بھال شروع کی لیکن وہ چاہتے تھے کہ وہ خود سے حرکت کر سکے تاکہ وہ اپنے اوپر آنے والی مشکلات کا سامنا کرسکے۔ اس کے بعد مختلف ماہرین کی مدد سے فروسٹی کے سائز کی خصوصی وہیل چیئر تیار کی گئی۔ ادارے کی سربراہ کے مطابق جیسے ہی انہوں نے یہ وہیل چیئر فروسٹی کو لگائی وہ فوراً ہی اپنی اگلی ٹانگوں کو حرکت دیتے ہوئے اس کے ساتھ چلنے پھرنے لگا۔ ان کے مطابق فروسٹی دنیا دیکھنے کا بہت شوقین نکلا اور اب وہ اپنے وزن سے بھاری وہیل چیئر کے ساتھ گو کہ دقت سے حرکت کر رہا ہے لیکن اس کے باوجود پورے ادارے میں گھوم پھر کر لوگوں اور جانوروں سے مل رہا ہے۔