عرب نیوز، رابطہ اسلامی کے تعاون سے آج حج ایپ جاری کریگا

جدہ.... انگریزی زبان میں شائع ہونے والا سعودی عرب کا کثیر الاشاعت روزنامہ عرب نیوز رابطہ عالم اسلامی کے تعاون سے حج ایپلی کیشن جاری کرے گا۔ اس پر حجاج کرام کو تازہ ترین خبریں ، ہنگامی خدمات پیش کرنے والے اداروں اور سفارتخانو ں کے نمبر دیئے جائیں گے۔ حجاج کرام کو ایپلی کیشن کے ذریعے اپنے اعزہ کے نام خیر و عافیت کا پیغام بھیجنے او ایپلی کیشن کوفروغ دینے کےلئے شرکت کا موقع دیا جائے گا۔ یہ ایپلی کیشن اسمارٹ فون رکھنے والوں کیلئے مفت ہوگی۔ اس پر حج شاعر کی براہ راست کوریج دی جائے گی۔ اینڈرائڈ سروس بھی مہیا ہو گی۔ ایمرجنسی نمبر سے فوری رابطے کا موقع بھی دیا جائے گا۔ راستہ بھول جانے والے حاجی یا حجن کو رہائش پہنچنے میں مدد دی جائے گی۔ رہائش کا پتہ بتایا جائے گا۔ عرب نیوز کے ایڈیٹر انچیف فیصل عباس نے مذکورہ ایپلی کیشن میں تعاون دینے پر رابطہ عالم اسلامی کا شکریہ ادا کیا اور اسے ابلاغی اداروں اور بغیر منافع والی تنظیموں کے درمیان تعاون کی روشن مثال قرار دیا۔ یہ ایپلی کیشن ایپل اسٹور یا گوگل پلے سے لوڈ کی جا سکتی ہے۔ مزید تفصیلات کیلئے www.arabnews.com/hajjapp وزٹ کریں۔افتتاح آج بدھ کو ہو گا۔