پاکستان محفوظ ملک،جرمن سفیر کا ٹرین میں سفر

اسلام آباد... پاکستان میں جرمنی کے سفیر مارٹن کوبلز نے راولپنڈی سے گوجرانوالہ تک ٹرین میں سفر کرکے دنیا کو پیغام دیا ہے کہ پاکستان پرامن اور محفوظ ملک ہے ۔ مارٹن کوبلز کوپاکستان میں تعیناتی کو ابھی صرف5 ہفتے ہوئے ہیں، اسلام آباد سے باہر یہ ان کا پہلا دورہ تھا۔ جرمن سفیر نے گوجرانوالہ چیمبر آف کامرس اینڈ انڈسٹری کے ارکان سے خطاب کیا۔ انہوں نے بتایا کہ اسلام آباد سے گوجرانوالہ تک ٹرین کا سفر کر کے آیا ہوں ۔ اس کا مقصد دنیا کے تمام یہ پیغام دینا ہے کہ پاکستان تجارت سمیت ہر لحاظ سے محفوظ ملک ہے۔ جرمنی اور پاکستان کے مابین پرانے اور مضبوط تجارتی تعلقات موجود ہیں۔ ان تعلقات کو مزید مستحکم بنانے کیلئے چیمبر اور سفارتخانہ دونوں کلیدی کردار ادا کریں۔ انہوں نے کہا کہ جرمنی کی کئی ایک کمپنیاں پاکستان کے مختلف سیکٹرز سالڈ ویسٹ، صاف پانی، انفراسٹرکچر و دیگر میں سرمایہ کاری کرنا چاہتی ہیں۔ پاکستان میں نوجوانوں کو تعلیم سے آراستہ کرنے کیلئے بھی جر من حکومت آپ کی مدد کرنا چاہتی ہے۔ہمیں بتائیں پاکستانی معیشت اور بدلتے ہوئے ماحول میں جرمنی کس طرح مدد کر سکتا ہے۔ انہوں نے یقین دلایا کہ حقیقی کاروباری حضرات کو کسی پریشانی کے بغیر ویزا جاری کیا جائے گا۔