ویسٹ انڈیزٹیم نومبر میں ٹی ٹوئنٹی سیریز کیلئے پاکستان کا دورہ کریگی

لاہور : پاکستان کرکٹ بورڈ کے چیئرمین نجم سیٹھی نے اعلان کیا ہے کہ ویسٹ انڈین کرکٹ ٹیم رواں سال نومبر میں3 ٹی ٹوئنٹی میچوں کی سیریز کیلئے پاکستان کا دورہ کرے گی۔پاکستان کرکٹ بورڈ نے ورلڈ الیون کے میچز دیکھنے کیلئے ویسٹ انڈین کرکٹ بورڈ کے صدر ڈیو کیمرون کو دعوت دی تھی تاکہ وہ 14 رکنی اسکواڈ کے دورے کے سلسلے میں کئے گئے سکیورٹی انتظامات کا جائزہ لے سکیں۔چیئرمین پی سی بی نے پاکستان آمد پر ڈیو کیمرون کا شکریہ ادا کرتے ہوئے کہا کہ ویسٹ انڈین بورڈ کے سربراہ کی آمد سے ویسٹ انڈین ٹیم کے دورہ پاکستان کی راہ ہموار ہوئی۔انہوں نے کہا کہ رواں سال نومبر میں ویسٹ انڈین ٹیم 3 ٹی ٹوئنٹی میچوں کیلئے پاکستان کا دورہ کرے گی تاہم میچز کن شہروں میں منعقد کئے جائیں گے، اس بات کا ابھی فیصلہ نہیں ہو سکا۔یاد رہے کہ مارچ 2009ءمیں سری لنکن ٹیم پر دہشت گرد حملے کے بعد پاکستان پر عالمی کرکٹ کے دروازے بند ہو گئے تھے اور 8 سال کے دوران زمبابوے کے علاوہ کسی بھی ٹیم نے پاکستان کا دورہ نہیں کیا لیکن ورلڈ الیون کے دورہ پاکستان سے ملک میں انٹرنیشنل کرکٹ کی بحالی کے امکانات روشن ہوئے ہیں۔یاد رہے کہ سری لنکن کرکٹ بورڈ بھی کہہ چکا ہے کہ اگر وہ ورلڈ الیون کو فراہم کئے گئے سکیورٹی انتظامات پر مطمئن ہوتے ہیں تو ایک ٹی ٹوئنٹی میچ کیلئے ٹیم پاکستان بھیجیں گے۔