قومی اسمبلی میں آج انتخابی اصلاحا ت بل پیش

اسلام آباد....قومی اسمبلی کا اہم اجلاس پیر کو ہوگا۔ انتخابی اصلاحات بل 2017 پیش کیا جائے گا ۔ سابق وزیراعظم نواز شریف کےلئے دوبارہ مسلم لیگ (ن) کے صدر بننے کی راہ ہموار ہوجائے گی۔قومی اسمبلی سیکریٹریٹ نے اجلاس کا 14 نکاتی ایجنڈا جاری کردیا ۔ وزیرقانون زاہد حامد الیکشن بل 2017 ایوان میں پیش کریں گے۔ انتخابی اصلاحات بل اس سے قبل سینیٹ سے منظور ہوچکا ہے۔ الیکشن بل 2017 کو ابتدائی طور پر قومی اسمبلی سے منظور کیا گیا تھا ۔ سینیٹ کی جانب سے کچھ تبدیلیاں کئے جانے کے بعد دوبارہ قومی اسمبلی میں منظوری کیلئے پیش کیا جارہا ہے۔ اسمبلی اجلاس میں چند مزید بل بھی پیش کئے جائیں گے ان میں لاءاینڈ جسٹس کمیشن آف پاکستان ترمیمی بل، شام کے اوقات میں عدالتوں کا بل اور معلومات تک رسائی 2017ءکا بل شامل ہیں۔ وزیر خزانہ اسحا ق ڈار بھی آڈیٹر جنرل ترمیمی بل 2017 ایوان میں پیش کریں گے۔ یاد رہے کہ سپریم کورٹ کی جانب سے نااہل ہونے کے بعد نواز شریف کو پولیٹکل پارٹیز آرڈر 2002 کی شق (1)5 کے تحت مسلم لیگ (ن) کی صدارت سے بھی مستعفی ہونا پڑا تھا تاہم اب الیکشن بل 2017 کی منظوری کے ساتھ ہی پولیٹکل پارٹیز آرڈر ختم ہوجائے گا۔