اسلام آباد... سابق وزیر اطلاعات پرویز رشید نے کہا ہے کہ ملک کی بدقسمتی رہی ہے اقتدار کسی اور کے پاس ہوتا ہے اور اختیار کسی اور کے جو آج کھل کر سامنے آگیا ۔میڈیا سے بات چیت کرتے ہوئے سابق وزیر اطلاعات نے کہاکہ تیسری مرتبہ منتخب ہونے والے وزیراعظم کو عدالت لایا گیا۔عدالت کو کھلا ہونے کے بعد بند کردیا گیا ۔جس نے بھی کھلی عدالت کو بند کیا اس کا نوٹس لینا سپریم کورٹ کا فرض ہے۔ پرویز رشید نے کہا کہ جمہوریت کےلئے اپنی کوششیں کیں اور اس کی قیمت ادا کررہے ہیں، اگر آج نواز عدالت کے سامنے اور ہم سب باہر کھڑے ہیں تو یہ وہ قیمت ہے جو پاکستان کے جمہوری سیاسی کارکن ادا کرتے ہیں اور ادا کررہے ہیں۔ یہ قیمت اس وقت تک ادا کریں گے جب تک اختیار عوام کو نہیں مل جاتا۔انہوں نے پرویز مشرف کا نام لیے بغیر کہا کہ ایک مجرم بھاگ گیا اور مظلوم گرفت میں ہے۔ اس سوال پر کہ پرویز مشرف کے جانے میں چوہدری نثار نے مدد کی۔ پرویز رشید نے کہاکہ چوہدری نثار ہماری مدد نہیں کرسکے ان کی کیا کریں گے۔
