اسلام آباد...سینیٹ نے نااہل شخص کے پارٹی سربراہ بننے کے خلاف قرارداد منظور کرلی۔ اعتزاز احسن نے ایوان کی جانب سے منظور کردہ الیکشن ایکٹ 2017 کے خلاف قرارداد پیش کی جس میں کہا گیا کہ عدالت سے نااہل شخص پارٹی کا سربراہ نہیں بن سکتا ۔ ایسا شخص پارلیمنٹ سے باہر بیٹھ کر اپنی سیاسی جماعت کی پالیسی بنائے گا اور اس کے فیصلے بھی کرے گا۔ پارلیمنٹ ایسے شخص کے ہاتھوں یرغمال بن جائے گی جو پارلیمنٹ میں داخل بھی نہیں ہوسکتا۔ ایوان سمجھتا ہے کہ نااہل شخص پارٹی کا عہدے دار نہیں ہونا چاہیئے۔قائد ایوان را جہ ظفرالحق نے کہا کہ بل اسی ایوان سے منظور ہوچکا ۔اب اسی قانون کے خلاف قرارداد لانا مناسب نہیں۔وزیر قانون زاہد حامد نے کہا کہ ہر ایک کو اپنا سربراہ منتخب کرنے کا حق ہے۔ اس لئے اس قرارداد پر ایوان میں بحث نہ کرائی جائے۔قرارداد کی منظوری کے لئے ایوان میں ووٹنگ کرائی گئی۔ قرارداد کے حق میں 52 جبکہ مخالفت میں 28 ووٹ دیئے گئے۔واضح رہے کہ سینیٹ نے گزشتہ اجلاس میں الیکشن بل 2017 کی منظوری کے وقت اپوزیشن کی شق 203 میں ترمیم مسترد کر دی تھی۔ اعتزاز احسن کی پیش کردہ ترمیم کے حق میں 37 اور مخالفت میں 38 ووٹ آئے تھے۔
