سری لنکن وزیر کیجانب سے مہر خلیل کو دورے کی دعوت

لاہور:پاکستانی بس ڈرائیور مہرخلیل جنہوں نے 8 سال قبل سری لنکن کرکٹرز کی جان بچانے میں اہم کردار ادا کیاتھا آئندہ پاکستان کرکٹ ٹیم کے دورہ سری لنکا پر ان کے ساتھ ہوں گے ۔ مہر خلیل کو اس دورے کی دعوت سری لنکن وزیر کھیل نے دی ہے۔بس ڈرائیور مہر خلیل نے بتایا کہ پاکستان اور سری لنکا کے درمیان قذافی اسٹیڈیم لاہور میں 29اکتوبر کو کھیلے گئے تیسرے اور آخری ٹی ٹوئنٹی انٹرنیشنل کے موقع پر پاکستان کرکٹ بورڈ نے انھیں خاص طور پر مدعو کیا تھا۔ اس موقع پر پی سی بی کے چیئرمین نجم سیٹھی نے ان کی ملاقات سری لنکا کے وزیر کھیل اورکرکٹ بورڈ کے چیئرمین سے بھی کرائی۔مہر خلیل نے کہاکہ اس ملاقات کے دوران سری لنکن وزیر کھیل نے ان سے کہا کہ جب پاکستان کرکٹ ٹیم سری لنکا کے دورے پر آئے تو آپ بھی ضرور ساتھ آئیں۔ خلیل نے بتایا کہ وزیر نے مذاقاً یہ بھی کہا کہ اس دورے میں آپ کو بس نہیں چلانی بلکہ ایک مہمان کی حیثیت سے میچز دیکھنے ہیں۔مہرخلیل نے بتایا کہ میں نے سری لنکن وزیر سے کہا کہ وہ اپنی ٹیم کو ضرور سپورٹ کریں گے۔ جس پر ان سے پوچھا گیا کہ آپ کی ٹیم کون سی ہے جس پر ان کا اخلاقی جواب تھا سری لنکا۔ انھوں نے کہا کہ ٹی ٹوئنٹی کیلئے لاہور آنے والی سری لنکن ٹیم کی بس بھی ڈرائیو کرنا چاہتے تھے لیکن سیکیورٹی کے سخت انتظامات کے پیش نظر یہ خواہش پوری نہیں ہو سکی۔ یاد رہے کہ مارچ2009 میں سری لنکن ٹیم کی جس بس پر لاہور ٹیسٹ کے موقع پر دہشت گردوں نے حملہ کیا تھا اس کے ڈرائیور مہر خلیل تھے۔ انھوں نے بہادری کا مظاہرہ کرتے ہوئے بس کو جائے وقوعہ سے نکال کر قذافی اسٹیڈیم پہنچایا تھا۔ سری لنکا کی حکومت نے انھیں اسی سال کولمبو مدعو کیا جہاں انعامات سے نوازا گیا جبکہ حکومت پاکستان کی طرف سے بھی مہر خلیل کو تمغہ شجاعت دیا جاچکا ہے،وہ کچھ عرصہ اپنے کاروبار کے سلسلے میں مراکش اور جنوبی افریقہ میں بھی مقیم رہے لیکن اب دوبارہ پاکستان میں ہیں اور لاہور ۔اسلام آباد روٹ پر بس کی ڈرائیونگ سیٹ سنبھال چکے ہیں۔