نئی دہلی۔۔۔پاٹیدار ریزرویشن تحریک کے روح رواں ہاردک پٹیل نے یہ اعلان کر کے سب کو حیران کر دیا کہ چونکہ کانگریس کھل کر پاٹیداروں کی حمایت کر رہی ہے اس لئے وہ گجرات اسمبلی انتخابات میں کانگریس کی حمایت کریں گے۔کئی روز سے ہاردک پٹیل سب سے بڑی حزب اختلاف کی سرعام حمایت کا اعلان کرنے سے یہ کہتے ہوئے گریز کر رہے تھے کہ کانگریس پہلے یہ بتائے کہ وہ گجرات میں بر سر اقتدار آنے کے بعد سرکاری ملازمتوں اور کالجوں میںپٹیل یا پاٹیدار برادری کو ریزرویشن دینے کے مطالبہ کو پورا کرنے کا کیا منصوبہ بنا رہی ہے۔اگرچہ کانگریس نے یہ مطالبہ نہیں مانا لیکن پھر بھی احمد آباد پہنچتے ہی ہاردک پٹیل نے اعلان کیا کہ وہ اپنی برادری سے کہہ رہے ہیں کہ بی جے پی کو اقتدار سے بے دخل کرنے کےلئے ووٹ کریں۔
