شاہ سلمان سے سعد الحریری کی ملاقات

ریاض.... خادم حرمین شریفین شاہ سلمان بن عبدالعزیز سے پیر کو ریاض کے قصر یمامہ میں لبنان کے مستعفی وزیراعظم سعد الحریری نے ملاقات کی۔ انہوںنے لبنان کی تازہ صورتحال پر بات چیت کی۔ دوسری جانب شاہ سلمان بن عبدالعزیز نے عسیر کے نائب گورنر شہزادہ منصور بن مقرن کے ہیلی کاپٹر حادثے میں جاں بحق ہوجانے پر شہزادہ مقرن بن عبدالعزیز سے ریاض کے ان کے گھر پہنچ کر تعزیت کی۔ شہزادہ منصور بن مقرن اورانکے ساتھی عسیر ریجن کے سیاحتی منصوبوں کا دورہ کرکے واپس آرہے تھے ۔ راستے میں ہی ہیلی کاپٹر گر جانے پر جاں بحق ہوگئے تھے۔ شاہ سلمان نے دعا کی کہ اللہ تعالی شہزادہ منصور اور انکے رفقاءکو اپنے فضل و کرم سے نوازے۔ ایوان شاہی نے اعلامیہ جاری کرکے بتایا کہ شہزادہ منصور کی نماز جنازہ آج منگل کو عصر بعد امام ترکی بن عبداللہ جامع مسجد میں ادا کی جائیگی۔ دریں اثناءشہزادہ خالد بن عبدالعزیز بن عیاف آل مقرن نے نیشنل گارڈز کے وزیر اور محمد بن مزید التویجری نے وزیر اقتصاد و منصوبہ بندی کی حیثیت سے پیر کو شاہ سلمان کے سامنے حلف اٹھایا۔