سلمان کی تصویر والی یونیورسٹی مارک شیٹ

ہندوستانی ریاست یوپی کے تعلیمی نظام میں بڑی غفلت سامنے آئی ہے۔ آگرہ یونیورسٹی نے بی اے سال اول میں کامیاب ہونیوالے طالبعلم کی مارک شیٹ بالی وڈ اداکار کی تصویر کیساتھ جاری کردی۔ یہ حیران کن واقعہ اس وقت پیش آیا جب یونیورسٹی کی جانب سے سالانہ اعزازی تقریب منعقد کرنے کی تیاریاں جاری ہیں جس میں ہندوستانی صدر شرکت کر کے کامیاب طلبا میں ڈگریاں تقسیم کرینگے ۔یونیورسٹی کی جانب سے تیار کی جانیوالی مارک شیٹ پر 17028700 رول نمبر درج ہے جس پر سلمان خان کی تصویر چسپاں ہے ۔آگرہ یونیورسٹی سے الحاق شدہ امرتا سنگھ میموریل کی جانب سے جاری ہونے والی مارک شیٹ میں دیکھا جاسکتا ہے کہ طالب علم نے 35 فیصد نمبر حاصل کئے ہیں۔ہندوستانی میڈیا کے مطابق یونیورسٹی انتظامیہ نے معاملہ سامنے آنے کے بعد تحقیقات کیں اور پھر مذکورہ کاپی درستگی کے بعد طالب علم کے حوالے کی گئی۔