امریکہ سے اعلی سطح پر رابطے ہیں،تہمینہ جنجوعہ
واشنگٹن ...سیکرٹری خارجہ تہمینہ جنجوعہ نے کہاہے کہ پاکستان اورامریکہ باہمی اعتماد کے فروغ اور خطے میں استحکام کے مشترکہ ہدف کیلئے ملکر کام کرنے کے طریقوں پر غور کرنے کیلئے اعلیٰ سطح پررابطے میں ہیں ۔ ہند اپنے اندرونی مسائل سے عالمی توجہ ہٹانے کیلئے کنٹرول لائن پرکشیدگی پیدا کرنے کی کوشش کررہاہے۔ غیرملکی صحافیوں کو بریفنگ میں سیکرٹری خارجہ نے کہاکہ دونوں ملکوں کے درمیان اعلیٰ سطح کے حالیہ رابطوں کامقصد ایک دوسرے کے موقف کو بہتر طورپر سمجھنا ہے۔انہوں نے کہاکہ پاکستان اورامریکہ دہشت گردی کے خلاف جنگ اور القاعدہ کے مکمل خاتمے میں کامیاب شراکت دار رہے ہیں۔ انہوں نے اپنی سرزمین سے ہرقسم کی دہشت گردی کے مکمل خاتمے کے مضبوط پاکستانی عزم کااعادہ کیا۔تہمینہ جنجوعہ نے کہاکہ پاکستان میں امن افغانستان کے امن واستحکام سے منسلک ہے۔ پاکستان شورش زدہ ملک میں امن کے قیام کیلئے افغانوں کی اپنی قیادت سے ان کے شروع کردہ مفاہمتی عمل کاحامی ہے۔سیکرٹری خارجہ نے کہاکہ امریکی حکام کے ساتھ اپنی ملاقاتوں میں سرحدی نظم ونسق اور دہشتگردوں کی طرف سے پاکستان کے خلاف افغانستان میں موجود محفوظ ٹھکانوں کے استعمال کے پاکستانی خدشات کو واضح کیا۔پاکستان اورہند کے درمیان جاری کشیدگی اور کنٹرول لائن پر فائرنگ کے تبادلے سے متعلق ایک سوال پر سیکرٹری خارجہ نے کہاکہ ہند اپنے اندرونی مسائل سے عالمی توجہ ہٹانے کیلئے کنٹرول لائن پرکشیدگی پیدا کرنے کی کوشش کررہاہے۔
