ایشین ٹیم اسکواش میں پاکستان کی ہیٹ ٹرک

سیول: ایشین ٹیم اسکواش چیمپئین شپ میں پاکستان نے سری لنکا کو شکست دے کر فتوحات کی ہیٹ ٹرک مکمل کرلی۔جنوبی کوریا میں جاری ایونٹ کے دوران گروپ بی کے میچ میں پاکستانی ٹیم نے شاندار کھیل پیش کرتے ہوئے سری لنکا کو0-3سے ہرا کر مسلسل تیسری کامیابی حاصل کی۔پہلے سنگل مقابلے میں طیب اسلم نے سری لنکا کے جیہان سونز کو ہرا کر ٹیم کو برتری دلائی، دوسرے سنگل مقابلے میں عماد فرید نے رویندر کو ہرا کر ٹیم کی برتری دوگنی کر دی۔تیسرے سنگل مقابلے میں محمد عاصم خان نے پریرا کو ہرا تے ہوئے ٹیم کو مسلسل تیسری کامیابی دلا دی۔پاکستانی ٹیم نے اس سے قبل پہلے میچ میں فلپائن اور دوسرے میچ میں میزبان جنوبی کوریا کو شکست دی تھی۔ دوسری جانب ویمنز ٹیم ایونٹ میں پاکستانی ٹیم نے تھائی لینڈ کو ہرا کر پہلی کامیابی حاصل کی، پاکستانی کھلاڑی مدینہ ظفر نے تھائی کھلاڑی اننتانا کو ہرا کر ٹیم کو برتری دلائی، دوسرے سنگل مقابلے میں پاکستان کی فائزہ ظفر نے تھائی لینڈ کی تودا کو ہرا کر ٹیم کی برتری دگنی کردی، تیسرے سنگل مقابلے میں پاکستان کی رفعت خان نے تھائی کھلاڑی سوویپا کو ہرا کر ٹیم کو 0-3سے فتح دلائی۔