سراج الحق نے اوپر سے حکم کا پیغام غلط سمجھا،پرویز خٹک
اسلام آباد...وزیر اعلی خیبر پختونخوا پرویز خٹک نے کہا ہے کہ امیر جماعت اسلامی سراج الحق نے انتہائی لغو اور من گھڑت بات کی ہے۔ بلوچستان سے سینیٹ چیئرمین منتخب کرانا میرا فیصلہ تھا۔ فاٹا سے ڈپٹی چیئرمین لینا تھا۔ فاٹا والوں نے اپنا بندہ نہیں دیا۔ میں نے امیر جماعت اسلامی سے کہا تھا کہ سینیٹ کے لئے ووٹ ان لوگو ں کو دینے ہیں۔ اوپر سے حکم آیا ہے۔ اوپر سے حکم سے میری مراد عمران خان تھے۔ سراج الحق نے اس پیغام کو غلط سمجھا اور توڑ مروڑ کر میڈیا کے سامنے پیش کیا ۔ انہوں نے کہا کہ تحریک انصاف نے اپنے ان ارکان کے خلاف کارروائی کی جو ہارس ٹریڈنگ میں ملوث پائے گئے۔ ن لیگ یا کسی دوسری پارٹی میں اتنی جرات ہے تو اپنے ان ارکان اسمبلی کے خلاف بھی کارروائی کریں۔ انسداد دہشت گردی عدالت اسلام آباد میں پیشی کے موقع پر میڈیا سے گفتگو کرتے ہوئے انہوں نے کہاکہ چوہدری سرور کو ن لیگ کے لوگوں نے بھی ووٹ دیا ۔ نواز شریف ان کے خلاف کارروائی کریں اور ثابت کریں کہ ن لیگ جمہوری سیاسی پارٹی ہے۔ یہ کام صرف تحریک انصاف ہی کرسکتی ہے۔
