ڈزنی لینڈ کی’’ جادو نگری‘‘ میں روبوٹ ڈریگن زور دار دھماکہ
فلوریڈا ..... یہاں قائم ڈزنی لینڈ کی مشہور تفریح گاہ ’’جادو نگری‘‘ میں اچانک ایک زور دار دھماکہ ہوا اور چاروں جانب آگ کے شعلے بلند ہونے لگے۔ صورتحال اتنی پریشان کن تھی کہ موقع پر موجود سیاحوں او ردوسرے لوگوں کو آگ سے بچنے کیلئے ادھر ادھر پناہ ڈھونڈنا پڑی، مشینی عفریت کا سر اور چہرہ آگ اگلنے لگا تھا۔اس موقع کی جو وڈیو سامنے آئی ہے اس سے پتہ چلتا ہے کہ دھماکے کے بعد یہ مشینی عفریت مکمل طورپر آگ کا گولہ بن گئی تھی اور اس سے اٹھنے والا سیاہ اور کثیف دھواں کافی بلندی اور دور تک پھیل گیا تھا۔ واضح ہو کہ ڈزنی لینڈ کے اس حصے میں ایسی جادوگری کے تماشے جاری میلے کا معمول ہیں اور روز ہی اس قسم کے تماشے دکھائے جاتے ہیں مگر یہ پہلا موقع تھا کہ روبوٹ ڈریگن زور دار دھماکے سے پھٹا اور پھر چاروں جانب آگ لگ گئی۔ حیرت انگیز بات یہ ہے کہ اتنے بڑے واقعہ کے بعد بھی کوئی شدید زخمی نہیں ہوا۔ بھگدڑ کی وجہ سے لوگوں کو معمولی چوٹیں آئیں مگر اس حوالے سے کوئی شکایت سامنے نہیں آئی۔ ڈزنی ورلڈ کے ترجمان کا کہناہے کہ پورے معاملے کی چھان بین کی جارہی ہے اور یہ معلوم کیا جارہا ہے کہ یہ سب کیسے ہوا؟ واقعہ کی خبر دیتے ہوئے مقامی اخبار اورلینڈو سینٹینر نے بتایا کہ ڈزنی لینڈ انتظامیہ نے اس روبوٹ کو اپنا بہت بڑا کارنامہ قرار دیا تھا اسی لئے تحقیقا ت کے دوران بھی پارک کو کھلا رکھنے کا فیصلہ کیا گیا ہے۔ جہاں تک اس کی کارکردگی کا تعلق ہے یہ ڈریگن ایک ملازم چلاتا ہے۔ جو عفریت کے گلے کے قریب بیٹھا رہتا ہے۔ جبکہ دوسرا اہلکار عفریت کے پچھلے حصے پر ہوتا ہے اور جادو نگری کے بقیہ ارکان پیدل تماشا دکھاتے ہیں۔
