عائشہ احد کی حمزہ شہباز کے خلاف ایک اور درخواست
لاہور.... عائشہ احد نے وزیراعلیٰ پنجاب شہباز شریف کے صاحبزادے حمزہ شہباز اور داماد علی عمران کے خلاف جنوبی چھاونی تھانے میں درخواست جمع کرادی۔ درخواست کے مطابق حمزہ شہباز نے 16 فروری 2011 کو گھر شفٹ کرنے کے بہانے انہیں بلایا، علی عمران کے ساتھ مل کر ان پر تشدد کیا۔جان سے مارنے کی دھمکیاں دیں ۔ موبائل فون، جیولری اور پرس چھین لیا۔عائشہ احد کے مطابق حمزہ شہباز اور علی عمران نے انہیں حبس بے جا میں رکھا اور صبح جب وہ جان بچا کر نکلیں تو ڈرائیور انہیں ایک اور مقام پر لے گیا۔درخواست کے مطابق عائشہ احد نے الزام لگایا کہ حمزہ شہباز اور علی عمران ان سے خالی اسٹیمپ پیپر پر دستخط کرانا چاہتے تھے۔ حمزہ شہباز کے غنڈے گھر سے لیپ ٹاپ، نکاح نامہ اور دستاویزات بھی چوری کرکے لے گئے۔ پولیس کے مطابق قانونی کارروائی کے لئے دائر درخواست کا جائزہ لیا جارہا ہے۔واضح رہے کہ 2 جون کو بھی چیف جسٹس ثاقب نثار کے حکم پر 7 سال بعد حمزہ شہباز سمیت 6 افراد کے خلاف عائشہ احد پر تشدد کا مقدمہ تھانہ اسلام پورہ میں درج کیا گیا تھا۔حمزہ شہباز کے خلاف تھانہ اسلام پورہ میں درج مقدمے میں تشدد، چوری، چھینا جھپٹی، توڑ پھوڑ ، جان سے مارنے کی دھمکیاں اور زیادتی کی کوشش کی دفعات شامل کی گئی تھیں۔
