ڈاکٹر شمشاد اختر نگراں وزیر خزانہ،قلمدانوں کا اعلان

اسلام آباد... نگران وفاقی وزراءکو ان کے محکموں کے قلمدان سونپ دیئے گئے ۔کابینہ ڈویژن کی طرف سے جاری نوٹیفکیشن کے مطابق عبداللہ حسین ہارون کو وزارت خارجہ امور ،قومی سلامتی ڈویژن کا قلمدان سونپا گیا ۔ان کے پاس وزارت دفاع ،وزارت دفاعی پیداوار کا اضافی چارج بھی ہوگا۔محمد اعظم خان کو وزارت داخلہ ،کیڈ ڈویژن ، وزارت انسداد منشیات، کا قلمدان دیا گیا۔ وزارت بین الصوابی رابطہ کا اضافی قلمدان بھی ان کے پاس ہوگا۔ڈاکٹر شمشاد اختر کو وزارت خزانہ ، محصولات و اقتصادی امور ، وزارت شماریات ، وزارت منصوبہ بندی ترقی واصلاحات کا قلمدان سونپا گیا ۔ وزارت تجارت و ٹیکسٹائل ، وزارت صنعت و پیداوارکا اضافی چارج بھی ان کے پاس ہوگا۔سید علی ظفر کو وزارت قانون انصاف پارلیمانی امور ،وزارت اطلاعات و نشریات ،قومی تاریخ و ادبی ورثہ کا قلمدان سونپا گیا ہے۔محمد یوسف شیخ کو وزارت وفاقی تعلیم و پیشہ ورانہ تربیت کا قلمدان سونپا گیا ۔ وزارت صحت ، خدمات ، وزارت مذہبی امور و بین العقیدہ ہم آہنگی کا اضافی چارج بھی ان کے پاس ہوگا۔مسز روشن خورشید بروچہ کو وزارت انسانی حقوق، وزارت امور کشمیر و گلگت بلتستان ، وزارت ریاستیں و سرحدی امور کا قلمدان سونپا گیا ہے۔

مزید پڑھیں:مختصر نگراں کابینہ نے حلف اٹھا لیا