وفاق میں مخلوط حکومت بنے گی ،شرجیل
کراچی...پیپلز پارٹی کے رہنما شرجیل میمن نے پیش گوئی کی ہے کہ عام انتخابات کے بعد وفاق میں مخلوط حکومت قائم ہوگی۔کراچی میں احتساب عدالت کے باہر میڈیا سے بات کرتے ہوئے انہوں نے کہا کہ عمران خان اور شہباز شریف کو انتخابات کے وقت سندھ یاد آتا ہے۔ انتخابات میں پیپلز پارٹی کا مقابلہ ان تمام سیاسی جماعتوں سے ہوگا جن کے کوئی اصول نہیں۔ کراچی سے عمران خان کا جیتنا مشکل ہی نہیں ناممکن ہے۔ شرجیل نے کہا کہ سندھ کے دیگر حلقوں کی نسبت میرے حلقے میں ریکارڈ ترقیاتی کام ہوئے۔ لوگ مجھے کارکردگی کی بنیاد پر دوبارہ منتخب کریں گے۔ انہوں نے کہا کہ پیپلزپارٹی کے علاوہ کرپشن الزامات کا شکار دیگر جماعتوں کے رہنماوں کو گرفتار نہیں کیا جاتا۔ نوازشریف کا وی آئی پی احتساب ہورہا ہے ۔ میں 8 ماہ سے جیل میں ہوں۔ کوئی ضمانت دینے کو تیار نہیں۔ عمران خان کے دوست زلفی بخاری کا نام بھی ای سی ایل میں تھا لیکن آدھے گھنٹے میں عدالتی حکم کے بغیر زلفی بخاری کا نام ای سی ایل سے خارج کر کے اسے ملک سے باہر جانے دیا۔زلفی بخاری برطانیہ میں عمران خان کے اخراجات برداشت کرتے ہیں۔پاکستان میں بھی زلفی بخاری ہی عمران خان کا کچن چلاتے ہیں۔نیب کا سندھ اور پنجاب میں دہرا معیار کیوں ہے۔انہوں نے کہا کہ چوہدری نثار کے ساتھ مکافات عمل ہورہا ہے، چوہدری نثار نے جس طرح لوگوں کے ساتھ ظلم کیا اور نام ای سی ایل میں ڈالے اس کی سزا بھگت رہے ہیں۔
