پی آئی اے میں بھرتیوں اور برطرفیوں پر پابندی‘ آڈٹ کا حکم
اسلام آباد: عدالت عظمیٰ نے پی آئی اے میں بھرتیوں اور برطرفیوں پر پابندی عاید کرتے ہوئے ادارے کے 10 سال کے خصوصی آڈٹ کا حکم جاری کردیا۔ ذرائع کے مطابق پی آئی اے کے طیاروں پر قومی پرچم کی جگہ مارخور کی تصویر رنگ کرنے سے متعلق کیس کی سماعت ہوئی۔ اس دوران عدالت نے آڈیٹر جنرل پاکستان کو پی آئی اے کے گزشتہ دس سال کا اسپیشل آڈٹ کرنے کا حکم دیا۔ عدالت نے ساتھ میں یہ بھی ہدایت کی کہ کیس کا فیصلہ ہونے تک کنٹریکٹ پائلٹس کے علاوہ پی آئی اے میں بھرتیوں اور برخاستگی پر پابندی عاید رہے گی۔چیف جسٹس میاں ثاقب نثار نے کہا کہ پسند ناپسند کے باعث ادارے کو نقصان پہنچا، جو لوگ اس کے ذمے دار ہیں انہوں نے ہاؤسنگ سوسائٹیاں اور فارم ہاؤس بنا رکھے ہیں، اس کیس میں مداخلت کا مقصد پی آئی اے کے خسارے کی وجوہات جاننا ہیں۔ پی آئی اے کی انتظامیہ مضبوط ہاتھوں میں ہونی چاہیے ، مارخور کی تصویر لگانے کے بجائے جہاز کے بیت الخلا کو بہتر کریں۔
