مسوڑھوں کی بیماریوں کی وجوہات اور نقصانات
مسوڑھوں کی بیماری منہ کی سب سے عام بیماریوں میں سے ایک ہے . اس بیماری کے مختلف مرحلے ہوتے ہیں . سب سے پہلے مرحلے میں مسوڑھوں کی سوجن کے ساتھ خون بہنا شروع ہوجاتا ہے . دوسرے مرحلے میں دانتوں کو مضبوط رکھنے والی ہڈی اور مسوڑھوں کے ریشے خراب ہونا شروع ہوجاتے ہیں . اس حالت کو پوئیوریا کہتے ہیں . عام طور پر اس صورتحال کی علامات اس وقت ظاہر ہوتی ہیں جب یہ بہت بگڑ چکی ہوتی ہے . دانتوں اور مسوڑھوں کے درمیان خلا کا بننا ، دانتوں کا ہلنا ، دانتوں کے درمیان فاصلہ بڑھنا ، بدبو دار سانس ، دانتوں سے مسوڑھوں کا ہٹنا جس کی وجہ سے دانت لمبے لگتے ہیں اورمسوڑھوں سے خون نکلنا اسکی علامات ہیں .
مسوڑھوں کی بیماری کی بہت سی وجوہات ہوسکتی ہیں جن میں سے ایک وجہ پلاک ہے . پلاک بیکٹیریا کی تہہ ہوتی ہے جو مستقل دانتوں پر بنتی رہتی ہے . اگر اسے دانتوں سے صاف نہ کیا جائے تو یہ مسوڑھوں کی سوجن کا باعث بنتا ہے . مسوڑھوں کی سوجن سےدانتوں میں خلا پیدا ہوجاتا ہے . بیکٹیریا اس خلا میں داخل ہو کر مسوڑھوں کے ریشے خراب کرنا شروع کردیتا ہے . یہ پلاک دانتوں پرمیل کی شکل اختیار کرلیتا ہے جسے ٹار ٹار کہتے ہیں . یہ بھی بیکٹیریا کی تہہ ہوتی ہے جو بہت سخت ہوتی ہے اور دانتوں پر سختی سے جمی ہوتی ہے . اسلیے اسے پلاک کے مقابلے میں صاف کرنا زیادہ مشکل ہوتا ہے . یوں بیکٹیریا مسوڑھوں کو نقصان پہنچاتا رہتا ہے . دانتوں اور مسوڑھوں کی حفاظت کے لیے منہ کی مناسب صفائی بہت ضروری ہے .
