2ماہ میں دوبارہ ہماری حکومت ہوگی،رانا مشہود

لاہور...مسلم لیگ (ن) کے مرکزی رہنما اور سابق وزیر رانا مشہود نے نجی ٹی وی چینل کو انٹرویو میں دعویٰ کیا کہ2 ماہ بعد اس پوزیشن میں ہوں گے کہ دوبارہ پنجاب میںحکومت بنا سکیں۔ جنہوںنے پی ٹی آئی پر گھوڑا سمجھ کر ہاتھ رکھا انہیں سمجھ آ گئی کہ یہ خچر نکلا ہے ۔ رانا مشہود نے کہا کہ جس طرح پی ٹی آئی کو اکثریت دی گئی یہ ساری دنیا کو پتہ ہے۔اب یہ سوچ پیدا ہورہی ہے کہ یہ لوگ ڈلیور نہیں کر پائے ۔ پی ٹی آئی والوں نے جو جھوٹ بولے وہ ایکسپوز ہو رہے ہیں ۔لوگوں کو جھوٹ بول کر پی ٹی آئی میں شامل کرایا گیا ۔آزاد امیدواروں سے جو وعدے کئے گئے وہ وفا نہیں ہوئے۔ وہ اپنے حلقوں میں منہ دکھانے کے قابل نہیں رہے۔انہیں یہ بھی پتہ چل گیا کہ شہباز شریف بہتر وزیر اعظم ہو سکتے تھے۔آج کی حکومت سے کہیں بہتر کارکردگی دکھا رہے ہوتے ۔ اس سوال کہ آپ کی ڈیل ہو گئی انہوں نے کہا کہ ڈیل کرنے والے لوگ نہیں۔ اصولوں پر چلنے والے لوگ ہیں ۔جس اسٹیبلشمنٹ کی بات کی جاتی ہے وہ بھی ہمارا ہی حصہ ہیں، ہمارے ہی لوگ ہیں۔انہوںنے کہا کہ ضمنی انتخابات ہو رہے ہیں جس میں جھوٹ کا بخار ایکسپوز ہوجائے گا۔ (ن) لیگ بہتر کارکردگی دکھائے گی ۔ اس کے علاوہ پنجاب میں50 سے زائد پٹیشنز پڑی ہیں۔ نئے قانون کے مطابق ان کا 6 ماہ میں فیصلہ ہونا ہے۔ پھر دودھ کا دودھ اور پانی کا پانی ہو جائے گا۔آئندہ 2ماہ بڑے اہم ہیں۔ بہت بڑی تبدیلی آئے گی ۔ پنجاب کے اندر زبردست طریقے سے سامنے آئیں گے۔رانا مشہود نے تحریک انصاف کی قیادت پر تنقید کرتے ہوئے کہا یہ لوگ جھوٹ بولتے رہے کہ ان کے پاس ماہر لوگ ہیں لیکن جہانگیر ترین کے لئے کھاد اور چینی کو مہنگا کر دیا گیا۔انہوںنے کہا کہ بیگم کلثوم نواز کا انتقال ہمارے لئے بڑا سانحہ تھا لیکن ہم عوام کو ان کے رحم و کرم پر نہیں چھوڑ سکتے ۔ حکومتی اراکین منشا بم جیسے لوگوں کی پشت پناہی کر رہے ہیں ۔ اب حکومت کا سو روز کا ہنی مون نہیں چلے گا بلکہ ان کا احتساب ہوگا۔ ٹی وی رپورٹ کے مطابق انہوں نے دعوی کیا کہ اب اسٹیبلشمنٹ سے ہمارے معاملات ٹھیک ہوگئے اسی طرح چلتا رہا تو 2 ماہ کے بعد پنجاب میں (ن) لیگ دوبارہ حکومت بنائے گی۔ شہبازشریف تمام اداروں کو ساتھ لے کر چلنے کی بات کرتے ہیں۔ یہ ادارے ہمارے اپنے ہیں۔ ان اداروں کی عزت میں کمی نہیں ہونی چاہیے۔