اوورسیز پاکستانیوں کےلئے خصوصی پیکیج لانے کا اعلان

  اسلام آباد...وزیراعظم عمران خان نے اوورسیز پاکستانیوں کےلئے خصوصی پیکیج لانے کا اعلان کرتے ہوئے کہاہے کہ اوور سیز پاکستانیوں کی ترسیلات زر کے لئے خصوصی مراعات دی جائیں گی۔ بینکنگ چینل سے رقوم بھیجنے کی راہ میں حائل رکاوٹیں دور کریں گے ۔ رکاوٹیں دور کرنے سے ترسیلات زر 20ارب ڈالر سے بڑھا کر 40ارب ڈالر تک جاسکتی ہیں۔ حکومت اوورسیز پاکستانیوں کے اثاثوں اور جائیدادوں کا قبضہ مافیا سے مکمل تحفظ بھی یقینی بنائےگی۔ جمعہ کو سوشل میڈیا پر جاری بیان میں انہوں نے کہا کہ بینکنگ چینلز سے ترسیلاتِ زر کی حوصلہ افزائی کےلئے خصوصی پیکج کا اعلان کرنے جا رہے ہیں ۔ فلپا ئن کامیابی سے یہ کارنامہ سرانجام دے چکا ہے۔انہوں نے کہا کہ اوور سیز پاکستانیوں کی ترسیلات زر کے لئے خصوصی مراعات دی جائیں گی ۔ اوورسیز پاکستانیوں کو وطن واپسی کے موقع پر امیگریشن کے حوالے سے درپیش مشکلات کے خاتمے کیلئے بھی خصوصی اقدامات اٹھا رہے ہیں۔ پاکستانی سفارتخانوں کو بیرون ملک مقیم پاکستانیوں کے تحفظات موثر انداز میں دور کرنے کی واضح ہدایات جاری کی جاچکی ہیں۔وزیر اعظم نے بیرون ملک پاکستانی مشنز کو پاکستانیوں کے خدشات بہتراندازمیں حل کرنے کی ہدایات جاری کردیں۔