پبلک اکاونٹس کمیٹی کا چیئر مین کون ہوگا؟

  اسلام آباد... تحریک انصاف نے اپوزیشن لیڈر شہباز شریف کو پبلک اکاونٹس کمیٹی کا چیئر مین نہ بنانے کا فیصلہ کرلیا۔ پیر کو وزیر اعظم کی زیر صدارت پارلیمانی پارٹی کااجلاس ہوا ۔وزیراعظم کے میڈیا ایڈوائزر افتخار درانی نے اجلاس کے بعد میڈیا کوبتایا کہ پارلیمانی پارٹی کے اجلاس میں تمام اراکین اسمبلی کو عوام اور حکومتی نمائندوں سے رابطوں کی ہدایات کی گئی ہے۔ انہوں نے بتایا کہ وزیراعظم نے اراکین اسمبلی سے کہا ہے کہ ادارہ جاتی کاموں کے لئے خود کو زیادہ سے زیادہ متحرک کریں۔ شکایات کے لئے قومی پورٹل بنایا جاچکا جو آئندہ 48 گھنٹوں میں شکایات وصول کرنے اور عوام کو ریلیف دینے کے لئے فعال ہو جائے گا۔ انہوں نے کہا کہ پارلیمانی پارٹی کے اجلاس میں یہ فیصلہ کیا گیا کہ پبلک اکاونٹس کمیٹی کے سربراہ کے لئے شہباز شریف کے سوا اپوزیشن جماعتوں سے مزید نام مانگے جائیں گے۔ وزیر خارجہ شاہ محمود قریشی کو ذمہ داری سونپی گئی ہے کہ وہ اپوزیشن جماعتوں سے رابطہ کرکے ان کے تجویز کردہ نام حکومت کو دیں ۔