انڈونیشی طیارے کے بلیک باکس کی تلاش

جکارتہ... حادثے کا شکار ہونے والے انڈونیشین مسافر طیارے کا بلیک باکس حاصل کرنے کے لئے زیرسمندر آپریشن شروع کردیا گیا۔ ریسکیو آپریشن کے دوران مزید مسافروں کی باقیات مل گئیں۔لائن ایئر کے طیارے بوئنگ 737 نے گزشتہ روز 189 مسافروں کو لے کر جکارتہ ایئرپورٹ سے اڑان بھری تھی کہ کچھ ہی دیر بعد سمندر میں گر کر تباہ ہوا ۔ پولیس حکام کے مطابق مسافروں کی شناخت کے لئے 132 رشتہ داروں کے نمونے جمع کرلئے۔ دوسری جانب طیارے کا بلیک باکس حاصل کرنے کے لئے غوطہ خوروں نے زیر سمندر آپریشن بھی شروع کردیا بلیک باکس کی تلاش کے لئے ڈرون کی مدد بھی لی جارہی ہے۔لائن ایئر کا طیارہ بوئنگ 737 بالکل نیا طیارہ تھا۔ اس نے 15 اگست کو ہی اپنی پہلی پرواز کے لیے اڑان بھری تھی۔کمپنی اور انجینئرز طیارے کے حادثے پر حیرانی کا شکار ہیں۔ انڈونیشین ایوی ایشن کا یہ سب سے بڑا سانحہ ہے جس میں 189 مسافر ہلاک ہوئے۔