حکومت نے کام نہیں کئے تو گھر جانا پڑے گا،زرداری

رحیم یار خان...سا بق صدر اور پیپلزپارٹی کے شریک چیئرمین آصف  زرداری نے کہاہے کہ حکومت نے کام نہیں کئے تو گھر جانا پڑے گا۔ مجھے نہیں لگتا عمران خان زیادہ دیر حکومت سنبھال سکے گا۔ رحیم یار خان میں جلسہ عام سے خطاب کرتے ہوئے سابق صدر نے کہا کہ ہر کوئی یہ سمجھتا ہے وہ ہم سے زیادہ ہوشیار ہے۔ بطور صدر اپنے اختیارات پارلیمنٹ کو واپس کئے۔ اگر اختیارات پارلیمنٹ کو نہ دیتا تو کوئی ڈینٹسٹ یا پکوڑے والا آج صدر نہ ہوتا ۔ کوئی اور صدر ہوتا۔ انہوں نے کہا کہ 18ویں ترمیم ہم اپنے لئے لائے تھے۔ یہ صوبوں کے لئے تھی تاکہ نچلی سطح تک اختیارات منتقل کئے جائیں۔انہوں نے کہا کہ کپتان نے جھوٹے وعدے کئے اور یوٹرن لئے۔ ان سے ن معیشت سنبھالی جاتی ہے اور نہ ملک سنبھالا جارہا ہے۔عمران خان پر تنقید کرتے ہوئے انہوںنے کہا کہ آپ نے جنوبی پنجاب صوبے کا اعلان کیا لیکن نعرہ ہمارا لیا ۔ہم نے کہا کہ چلیں بسم اللہ آپ ہی بنالیںلیکن انہوں نے نعرے تو لگاد ئیے مگر اب ان میں صوبہ بنانے کی ہمت نہیں۔ یہ کہتے ہیں کہ نپولین نے یوٹرن نہیں لیا۔ دوکتابیں پڑھنے والے کوکیا پتہ تاریخ میں نپولین اور ہٹلرکو ہیرو تسلیم نہیں کیا گیا۔انہوں نے کہا کہ ہر دور میں سیاسی مخالفین جیلوں میں رہے لیکن پیپلزپارٹی کے دور میں ایک بھی سیاسی قیدی نہیں تھا۔ مخالفین کو جیلوں میں رکھا نہ کسی کا احتساب کرنے کا سوچا۔