پاکستان فٹبال فیڈریشن پر پھر معطلی کے سائے

لاہور: پاکستان فٹبال فیڈریشن پر ایک بار پھر معطلی کے سائے منڈلانے لگے ہیں۔فیفا کا کہنا ہے کہ 12 دسمبر کو کروائے جانے والے پاکستان فٹبال فیڈریشن( پی ایف ایف) کے انتخابات فیفا ممبر ایسوسی ایشن کمیٹی کی جانب سے کئے جانے والے فیصلے سے مطابقت نہیں رکھتے، اگر پی ایف ایف کے الیکشن کروائے گئے تو معاملہ فیفا کی متعلقہ باڈیز کے سامنے رکھ دیا جائے گا،اس ضمن میں جو کارروائی ممکن ہے، اس کے تحت پی ایف ایف کی معطلی بھی ہو سکتی ہے۔یاد رہے کہ قبل ازیں فیفا کی ممبرز ایسوسی ایشن کمیٹی کے فیصلے کے تحت پی ایف ایف کو اپنا اسٹیٹس مطلوبہ معیار کے مطابق لانے، کلبز کی ا سکروٹنی اور رجسٹریشن، اضلاع کے الیکشن سے لے کر ایگزیکٹو کمیٹی اور صدر کے انتخاب تک کے مراحل مکمل کرنے کیلئے جو روڈ میپ دیا گیا تھا اس کے مطابق الیکشن مارچ 2020 میں ہونا تھے۔عالمی باڈی کی جانب سے کلبز کی رجسٹریشن اور اسکروٹنی کا عمل نومبر2018 ءسے اگست 2019ء تک، پی ایف ایف کے اسٹیٹس اور انتخابی ضابطوں کے حوالے سے کام نومبر 2018ءسے جولائی 2019ء تک مکمل کرنے کیلئے کہا گیا تھا،اگست میں پی ایف ایف کانگریس نئے اسٹیٹس اور انتخابی ضابطے کے مطابق الیکٹورل کمیٹی تشکیل دینے، اکتوبر میں ضلعی، دسمبر میں صوبائی سطح، مارچ میں ایگزیکٹو کمیٹی کے الیکشن تجویز کئے گئے تھے۔

 کھیلوں کی مزید خبریں اور تجزیئے پڑھنے کیلئے واٹس ایپ گروپ"اردو نیوزاسپورٹس"جوائن کریں