حکومت نے بدنیتی ظاہر کردی، احسن اقبال

  اسلام آباد... مسلم لیگ (ن) نے قومی اسمبلی میں قائد حزب اختلاف شہباز شریف کے بجائے کسی اور رہنما کو پبلک اکاﺅنٹس کمیٹی کا چیئرمین بنانے کے تاثر کو رد کرتے ہوئے کہا ہے کہ اس معاملے پر کسی قسم کا سمجھوتہ نہیں کیا جائےگا۔مسلم لیگ (ن) کے رہنما احسن اقبال نے چیئرمین پبلک اکاونٹس کمیٹی کے نام سے متعلق وضاحت کرتے ہوئے کہا کہ10 سال سے روایت ہے کہ چیئرمین پی اے سی اپوزیشن لیڈر ہی بنتا ہے۔ اس روایت کا احترام مسلم لیگ (ن) اور پیپلزپارٹی نے کیا۔ چیئرمین پی اے سی کےلئے مسلم لیگ (ن) کا اصولی موقف ہے اور شہباز شریف کے نام پر کوئی سمجھوتہ نہیں ہوگا۔مسلم لیگ (ن) کے رہنما نے کہا کہ حکومت نے پنجاب اور خیبر پختونخوا میں اپنے چیئرمین پی اے سی بنا کر اپنی بدنیتی ظاہر کردی۔احسن اقبال نے کہا کہ صاف ظاہر ہے کہ حکومت احتساب کے عمل سے راہ فرار اختیار کرنا چاہتی ہے۔حکومت اپوزشن کا تو احتساب چاہتی ہے مگر اپنا احتساب کرنا نہیں چاہتی۔