پیپلز پارٹی جنگ چاہتی ہے تو ریاست اپنے انداز سے نمٹے گی‘ گورنر سندھ

کراچی: گورنر سندھ عمران اسماعیل نے کہا ہے کہ میرے پاس ایسی کوئی اطلاع نہیں کہ سندھ میں گورنر راج لگ رہا ہے ۔ ذرائع کے مطابق ایم کیوایم کے رہنما خواجہ اظہار الحسن کے ساتھ سکھر میں میڈیا سے گفتگو کرتے ہوئے گورنر سندھ کا کہنا تھا کہ عوامی نمائندے جو مینڈیٹ لے کر آئے ہیں اسے پورا کریں۔ انہوں نے مزید کہا کہ حالیہ ٹارگٹ کلنگ کے واقعات میں کچھ گرفتاریاں ہوئی ہیں، کراچی میں افسوسناک واقعات ہوئے ہیں، جن پر قابو پالیا جائے گا۔ نجی ٹی وی کے مطابق صحافیوں سے گفتگو کرتے ہوئے گورنر سندھ کا مزیدکہنا ہے کہ جے آئی ٹی کی رپورٹ انتہائی افسوسناک ہے ،پیپلز پارٹی کون سے میدان میں لڑنے کی دھمکی دے رہی ہے ؟ عمران اسماعیل نے یہ بھی کہا کہ جے آئی ٹی رپورٹ کے بعد اگرکوئی جنگ کرنا چاہتا ہے تو ریاست اس سے اپنے انداز سے نمٹے گی، کوئی قانونی جنگ لڑنا چاہتا ہے یا سڑکوں پر یہ ان کی اپنی چوائس ہے ۔ اس موقع پر خطاب کرتے ہوئے ایم کیو ایم رہنما خواجہ اظہار الحسن نے کہا کہ وزیر اعلیٰ سندھ مراد علی شاہ کو سیکورٹی بڑھانے کا کہا تھا لیکن کچھ نہیں ہوا۔ انہوں نے یہ بھی کہا کہ اگر کیسز بنے ہیں تو عدالتوں کا سامنا کرنا چاہیے ، ملک محاذآرائی کا متحمل نہیں ہو سکتا۔