ملتان سکھر موٹروے منصوبے سے خزانے کو 70 ارب کا نقصان؟

اسلام آباد ... وفاقی وزیر مواصلات مراد سعید نے ملکی اداروں کو تباہ کرنے کے حوالے سے حقائق بتاتے ہوئے کہا ہے کہ مسلم لیگ (ن) نے ملتان سکھر موٹروے منصوبے سے قومی خزانے کو 70 ارب کا نقصان پہنچایا ۔منصوبے پر کام کے بدلے جاوید صادق کو کمپنی کا ڈائریکٹر بنایا گیا۔ اس منصوبے پر ایم او یو احسن اقبال نے کئے تھے۔ عوام کا پیسہ لوٹا گیا ۔ نیب معاملے کی تحقیقات کر رہا ہے۔این ایچ اے نے گزشتہ چند ماہ میں قومی خزانے کو 4329 ملین روپےکا فائدہ پہنچایا ہے۔جلد پیپلز پارٹی دور میں رقم لاڑکانہ منتقل کرنے کی تفصیلات بھی سامنے رکھوں گا۔ جمعہ کو پریس کانفرنس سے خطاب کرتے ہوئے وفاقی وزیر مواصلات نے کہا کہ تمام باتیں شواہد کے مطابق بات کر رہا ہوں۔ انہوں نے کہا کہ ملتان سکھر موٹر وے منصوبہ شروع ہونے کے وقت یہ لوگ ایک کمپنی کے پاس گئے۔2015ءمیں بڈنگ کر کے کہ اسی کمپنی کو ٹھیکہ دیا گیا جس کےساتھ ایم او یو ہو چکا تھا۔ انہوں نے کہا کہ جاوید صادق کو اس کام کے بدلے کمپنی کا ڈائریکٹر بنایا گیاجہاں وہ بطور ایجنٹ کام کررہے تھے۔ منصوبے سے متعلق ایم او یو پر دستخط احسن اقبال نے کئے تھے۔ منصوبے کا مکمل تخمینہ 259 ارب روپے لگایا گیا تھا۔ تحقیقات کے بعد احسن اقبال کا کردار سامنے آیا ۔ انہوں نے کہا کہ احسن اقبال شرافت کا لبادہ اوڑھ کر اب روز یہاں پریس کانفرنس کریں گے۔ انہوں نے کہا کہ گزشتہ دور حکومت کے وزیر مملکت کا ٹی اے ڈی اے میری تنخوا سے بھی زیادہ تھا۔ انہوں نے کہا کہ یہ پہلی قسط تھی۔ اگلی قسط پیپلز پارٹی سے متعلق ہوگی۔ انہوں نے کہا کہ پیپلز پارٹی کے دور میں رقم لاڑکانہ منتقل کرنے کی تفصیلات بھی سامنے رکھوں گا۔ہم بڑے خواب دیکھ کر آئے ہیں،کرپٹ عناصروں کو جیل میں ڈالنا ہے۔