انڈین طیارے پاکستان میں کہاں آئے؟
وحید مراد۔ اردو نیوز، اسلام آباد
پاکستان کی فوج کے ترجمان میجر جنرل آصف غفور نے جب منگل کی علی الصبح ٹویٹ کر کے بتایا کہ انڈیا کے جیٹ طیاروں نے لائن آف کنٹرول کی خلاف ورزی کرتے ہوئےپے لوڈ گرایا ہے تو ہر طرف یہ سوال پوچھا جانے لگا کہ انڈین جنگی طیارے پاکستان کے حدود میں کہاں تک آئے؟
سوشل میڈیا پر صارفین یہ سوال پوچھتے رہے کہ طیارے لائن آف کنٹرول کے اندر کس جگہ تک آئے؟ تو اس دوران فوج کے ترجمان نے دوسرے ٹویٹ میں تصاویر لگا کر بتایا کہ جوابی کارروائی کے نتیجے میں انڈیا کے جنگی طیارے بالاکوٹ میں واقع جنگل میں اضافی بارود گرا کر جلد بازی میں چلے گئے۔
ٹویٹر پر بعض صارفین نے لکھا کہ بالاکوٹ خیبر پختونخوا کے ضلع مانسہرہ والا نہیں بلکہ مظفر آبادکے قریب کسی بالاکوٹ نامی جگہ پر انڈین طیاروں نے اضافی گولہ بارود گرایا ہے ۔ اس دوران مانسہرہ اور بالاکوٹ کے درمیان مقامی آبادی میں سے بہت سے شہریوں نے بتایا کہ علی الصبح علاقے میں دھماکوں کی آوازیں سنی گئی ہیں۔
مانسہرہ کے صحافی نعمان شاہ نے بتایا کہ وہ دیگر رپورٹرز کے ساتھ علاقے میں پہنچے مگر بارش کی وجہ سے اس مقام تک نہ جا سکے جہاں مقامی شہریوں کے بقول دھماکوں کی آوازیں آئیں تھیں۔ ان کا کہنا تھا کہ پولیس اہلکاروں نے بھی مقامی لوگوں کو جنگل میں اندر جانے سے روک دیا۔
مقامی شہریوں سہیل احمد اور ملک صیاد نے مانسہرہ سے آئے رپورٹرز کو بتایا کہ انہوں نے پیر کی رات کے تیسرے پہر 3اور 4 بجے کے درمیان دھماکوں کی آوازیں سنیں۔تھانہ بالاکوٹ پولیس کے اہلکار بھی مانسہرہ سے بالاکوٹ جانے والی شاہراہ تک ہی محدود رہے اور جنگل کے اندر جانے کی کوشش نہیں کی۔ مقامی صحافیوں کے مطابق پولیس اہلکار بات کرنے سے کترا رہے ہیں اوران کا کہنا ہے کہ جنگل کے اندر آبادی نہیں ۔
مقامی صحافیوں کے مطابق انڈین طیاروں نے جہاں اضافی گولہ باردو گرایا، وہ مقام بالاکوٹ شہر سے تقریباً18 کلومیٹر جنوب مشرق میں واقع جابہ ٹاپ کہلاتی ہے جہاں دھماکوں کی آوازیں سنی گئیں۔مانسہرہ سے بالاکوٹ بذریعہ سڑک فاصلہ 39کلومیٹر ہے جبکہ جابہ ٹاپ مانسہرہ اور بالاکوٹ کے درمیان بلند پہاڑی مقام ہے ۔ پاکستانی فوج کے ترجمان کی جانب سے جو تصاویر شیئر کی گئیں وہ جگہ مانسہرہ سے 20کلومیٹر شمال مشرق میں ہے ۔ جابہ ٹاپ سے اتر کر شمال میں بالاکوٹ کا شہر 18کلومیٹر کے فاصلے پر ہے ۔
