معاشرے کے کمزور طبقات کی دیکھ بھال ریاست کی ذمہ داری

لاہور...وزیر اعظم عمران خان نے کہا ہے کہ معاشرے کے کمزور طبقوں کی دیکھ بھال ریاست کی ذمہ داری ہے۔ ریاست احساس کا نام ہے جو کمزور طبقوں کا سہارا بنتی ہے۔بے گھر اور مستحق افراد کا سہارا بننے کی مہم میں مخیر حضرات کا بڑھ چڑھ کر حصہ لینا حوصلہ افزا ہے۔عوام کو ریلیف فراہم کرنے والے اقدامات کو ترجیح دی جائے گی۔ملاوٹ مافیا کوکسی صورت معاف نہیں کیا جائے گا ۔ ایسے عناصر کے خلاف بلا تفریق آپریشن جاری رہنا چاہیے۔سیاحت کے فروغ کےلئے مربوط پالیسی مرتب کی جائے ۔وہ ایوان وزیر اعلیٰ میں اپنی زیر صدارت اجلاسوں سے خطاب کررہے تھے ۔ گورنر چوہدری محمد سرور اور وزیر اعلیٰ سردار عثما ن بزدار نے بھی وزیر اعظم سے ون آن ون ملاقات کر کے صوبے کے امور پر تبادلہ خیال کیا ۔ وزیر اعظم نے صوبے میں پناہ گاہوں کے قیام ، سیاحت کے فروغ ، پنجاب فوڈ اتھارٹی کی جانب سے ملاوٹ کے خلاف اقدامات اور کلین اینڈ گرین پاکستان مہم میں اب تک کی پیشرفت کا بھی جائزہ لیا ۔صوبائی حکومت کی جانب سے وزیراعظم کو لاہور میں پناہ گاہوں کے قیام کے حوالے سے پیشرفت اور آئندہ مہینوں میں صوبے بھر میں مزید پناہ گاہوں کے قیام کے حوالے سے لائحہ عمل پرتفصیلی بریفنگ دی گئی۔کمشنر لاہور ڈویژن نے بریفنگ کے دوران بتایا کہ لاہور میں اس وقت5 پناہ گاہوں کے قیام پر کام جاری ہے جن میں سے 3 اپریل میں جبکہ2مئی میں پایہ تکمیل کو پہنچ جائیں گی۔ ان پناہ گاہوں کی نگرانی مخیر حضرات پر مشتمل گورننگ بورڈ کرے گا اور حکومت اس ضمن میں فیسلیٹی اور سپورٹرکا کردار ادا کرے گی۔ اس ضمن میں قانونی پہلووں کے حوالے سے لائحہ عمل پر بھی بریفنگ دی گئی ۔مخیر حضرات کی اجلاس میں اسپتالوں سے ملحقہ مریضوں کے لواحقین کے لئے قیام و طعام اور اس ضمن میں تعاون کی تجویز پروزیر اعظم نے صوبے بھر میں پناہ گاہوں کے قیام میں مخیر حضرات کی رضاکارانہ دلچسپی اور عملی خدمات کی حوصلہ افزائی کی اور مکمل حکومتی تعاون کا اعادہ کیا ۔ وزیر اعظم نے ہدایت کی کہ زیادہ سے زیادہ ضرورت مند اور بے گھر افراد کے لئے پناہ گاہوں میں گنجائش میں اضافہ کیا جائے اور اس ضمن میں توسیع کے حوالے سے ہر ممکن اقدامات اٹھائے جائیں۔ عمران خان نے کہا کہ معاشرے کے کمزور طبقوں کی دیکھ بھال ریاست کی ذمہ داری ہے۔ریاست احساس کا نام ہے جو کمزور طبقوں کا سہارا بنتی ہے۔وزیرِ اعظم کی زیر صدارت اجلاس میں صوبہ پنجاب میں خوراک میں ملاوٹ کے خلاف پنجاب فوڈ اتھارٹی کی جانب سے اقدامات پر تفصیلی بریفنگ د ی گئی ۔ وزیر اعظم نے کہا کہ ملاوٹ مافیا کو کسی صورت معاف نہیں کیا جائے گا۔ ایسے عناصر کے خلاف بلا تفریق آپریشن جاری رہنا چاہیے۔وزیر اعظم کی زیر صدارت سیاحت کے فروغ کے حوالے سے بھی اجلاس ہوا ۔ وزیر اعظم نے سیاحت کے فروغ کےلئے اقدامات کرنے کی منظوری دی ۔اجلاس کے دوران وزیر سیاحت راجہ یاسر ہمایوں نے مذہبی مقامات کو سیاحتی فروغ کے لئے استعمال کرنے سے بھی آگاہ کیا۔ وزیر قانون راجہ بشارت اور اٹارنی جنرل انور منصور نے بھی وزیر اعظم سے ملاقات کی ۔اس دوران وزیر اعظم کو نیشنل ایکشن پلان کے تحت کالعدم تنظیموں کے خلاف کارروائیوں کے بارے میں آگاہ کیا گیا۔