کک باکسر میک گریگر کا ریٹائرمنٹ کا اعلان

آئرلینڈ سے تعلق رکھنے والے معروف مکسڈ مارشل آرٹس (ایم ایم اے) فائٹر30سالہ کونر میک گریگر نے ریٹائرمنٹ کا اعلان کردیا۔مک گریگر نے ساتھ ہی کھیل میں اپنے سابق ساتھیوں کیلئے مستقبل میں نیک خواہشات کا بھی اظہار کیا ۔آئرلینڈ کے میک گریگر سابق الٹیمیٹ فائٹنگ چیمپیئن شپ، فیدر ویٹ اور لائٹ ویٹ باکسنگ چیمپیئن اور مکسڈ مارشل آرٹس  کے بڑے اسٹارز میں سے ہیں۔ گزشتہ برس اکتوبر میں روسی ایم ایم اے فائٹر خبیب نرما گومیدوف کے ہاتھوں شکست کے بعد جھگڑا کرنے پر کونر میک گریگر پر نویڈا ایتھلیٹک کمیشن (این اے سی) نے 6 ماہ کی پابندی اور 50 ہزار ڈالر جرمانہ بھی عائد کردیا تھا۔کونر میک گریگر کو  اپنے مداح سے زبردستی موبائل فون چھین کر پھینکنے کے الزام میں 12 مارچ کو امریکی ریاست فلوریڈا میں گرفتار کر لیا گیا تھا۔ میک گریگر فونٹین بلیو ماونٹین بیچ سے نکل رہے تھے کہ ایک 22سالہ شخص نے ان کی تصویر لینے کی کوشش کی جس پر ایم ایم اے فائٹر نے موبائل اٹھا کر پھینک دیا اور اسے کچلنے کی کوشش کی۔بعدازاں انہوں نے موبائل فون اٹھایا اور چلے گئے اس حرکت پر پولیس نے انہیں ان کی رہائش گاہ سے گرفتار کیا جس کے بعد میک گریگر کو 12ہزار ڈالر کا بانڈ بھرنے کے بعد رہا کردیا گیا تھا۔

 کھیلوں کی  مزید خبریں اور تجزیئے پڑھنے کیلئے واٹس ایپ گروپ" اردونیوزاسپورٹس" جوائن کریں