اسلام آباد...وزیر اعظم عمران خان نے اپوزیشن کو پھر شدید تنقید کا نشانہ بناتے ہوئے واضح کیا ہے کہ حکومت کہیں نہیں جارہی ،آصف زرداری جیل جانے والے ہیں ۔جعلی اکاونٹس کی جے آئی ٹی میں آصف زرداری کا 100 ارب روپے کا انکشاف ہوا ہے ۔ شریف خاندان کا بھی سو ارب سے زائد ملک سے باہر ہے ۔جتنا مرضی دھرنے دیں، جلوس کریں ،آپ کو جواب دینا پڑے گا ۔ اقتدار میں آیا ہی چوروں اور کرپٹ لوگوں کا احتساب کرنے کےلئے ہوں ۔ کسی سے بلیک میل نہیں ہوگا ۔
این این آئی کے مطابق جمعہ کو جمرود میں جلسے سے خطاب کرتے ہوئے انہوںنے بلاول اور آصف علی زر داری کی تقریر کا جواب دیتے ہوئے کہا کہ گزشتہ روز جلسہ ہوتا ہے جس میں لوگوں کو 200 سے 500 روپے دے کر بلایا گیا ۔ باپ، بیٹا بات کر رہے ہیں کہ ہم اسلام آباد دھرنا دینے آرہے ہیں۔ آصف زرداری میری بات سن لو دھرنا تب کامیاب ہوتا ہے جب آپ عوام کے دکھ درد میں شامل ہوتے ہیں اور ساتھ کھڑے ہوتے ہیں۔ آصف زرداری اور بلاول کو دعوت دے رہا ہوں کہ آئیں اسلام آباد میں آکر دھرنا دیں ۔ آپ کےلئے کنٹینر تیار کروا رہا ہوں اور کھانا بھی پہنچاوں گا ۔ میرا چیلنج ہے کہ آپ ایک ہفتہ کنٹینر پر گزار کر دکھا دیں۔ آپ کنٹینر پر ایک ہفتہ بھی نہیں گزار سکتے کیونکہ جو لیڈر پرچی دکھا کر کہے کہ مجھے جماعت وراثت میں مل گئی وہ لیڈر نہیں بن سکتا کیونکہ لیڈر جدوجہد، مار کھا کر بنتا ہے۔
انہوں نے کہا کہ ایک دوسرا آدمی بھی ملین مین مارچ کی بات کر رہا ۔ مولانا فضل الرحمن کی الیکشن میں وکٹ اڑ گئی اور وہ کلین بولڈ ہوگئے، وہ 12 ویں کھلاڑی بنے ہوئے ہیں اور کوشش کر رہے ہیں کہ کسی طرح حکومت گرادوں تاکہ میری باری آجائے لیکن ان کی باری نہیں آنے والی۔ مولانا فضل الرحمان کی مثال ایسی ہے کہ نہ خود کھیلوں گا اور نہ کھیلنے دوں گا۔ مولانافضل الرحمان ایسے کھلاڑی کی طرح ہیں جو پورا دن فیلڈنگ کرتے رہتے ہیں۔ جب باری آتی ہے تو پہلی ہی گیند پر آوٹ ہو جاتے ہیں۔انہوںنے کہاکہ آصف زرداری بھی جتنا مرضی زور لگا لیں۔حکومت کہیں نہیں جارہی لیکن آپ جیل میں جانے والے ہیں۔وزیر اعظم نے کہا کہ جب سے حکومت آئی ہے یہ لوگ شروع ہوگئے کہ حکومت ناکام ہوگئی۔ آپ نے 5،5 سال حکومت کرکے قرضہ دگنا کردیا۔ ہمیں 7 ماہ ہوئے ہیں۔ آپ کہہ رہے ہیں کہ جو قرضہ چڑھایا ہے وہ ہم اتاردیں۔ آپ چاہتے ہیں کہ جو 5 سال میں ملک تباہ کیا ہے اسے ہم 7 ماہ میں ٹھیک کردیں، یہ ملک ہم ٹھیک کریں گے۔
سابق وزیر خزانہ اسحٰق ڈار کے حوالے سے انہوں نے کہا کہ وہ ملک سے باہر بھاگے ہوئے ہیں اور وہاں سے بیان دے رہے ہیں کہ معیشت کیسے ٹھیک ہوگی۔ ان کے بچے ملک سے باہر ہیں، اسی طرح نواز شریف کے دونوں بیٹے باہر ہیں۔ اربوں روپے کے گھر میں رہتے ہیں ۔ جب گھر کے بارے میں پوچھوں تو کہتے کہ ہم پاکستان کے شہری نہیں۔انہوں نے کہا کہ اگر ان لوگوں نے کچھ نہیں کیا تو پاکستان آکر عدالتوں میں جواب کیوں نہیں دیتے۔مجھے جب طلب کیا گیا تو میں نے عدالت میں جواب دیا اور 60 دستاویزات اور 40 سال پرانے معاہدے دکھائے۔میں نے تو یہ نہیں کہا کہ جمہوریت خطرے میں ہے۔سیاسی لیڈر کا کام ہے کہ وہ عوام کو جواب دے لیکن جب ان سے سوال کرو تو جمہوریت خطرے میں ہوجاتی اور سندھ کارڈ کھیلنے لگتے۔
عمران خان نے قبائلی علاقوں کے لئے منصوبوں کا اعلان کرتے ہوئے کہا کہ یہاں جبہ اور بارہ ڈیم بنائیں گے جس سے لاکھوں لوگوں کو پانی ملے گا اور کاشت کاری ہوگی اس کے علاوہ بارہ بائی پاس بھی بنایا جائے گا اور سہو لتیں فراہم کی جائیں گی۔ بجلی اور گیس کی فراہمی کی بھی کوشش کروں گا۔ آئندہ 10 برس تک قبائلی علاقوں کے لئے ہر سال 100 ارب روپے خرچ ہوگا۔عمران خان نے کہا کہ طورخم سرحد کو 24 گھنٹے کھولا جائے گاکیونکہ یہ لوگوں کا روزگار ہے ۔اس کے بند ہونے سے نقصان ہوتا ہے۔افغانستان کے حوالے سے وزیر اعظم نے کہا کہ افغانستان میں انتخابات سے پہلے عبوری حکومت کا کہا تو مجھ پر تنقید کی گئی لیکن میں کہنا چاہتا ہوں کہ افغانستان کے لوگوں کو اپنا بھائی سمجھتے ہیں۔ اگر الیکشن سے افغانستان میں امن حاصل کرنا ہے تو ایسی عبوری حکومت سے انتخابات کروائے جنہیں وہاں کے لوگ غیر جانبدار سمجھیں۔ افغانستان کے خیر خواہ ہیں اور وہاں کی بہتری چاہتے ہیں۔انہوں نے افغان حکومت کو مخاطب کرتے ہوئے کہا کہ بھائیوں کی طرح مشورہ دیا اگر اسے نہیں ماننا تو نہیں مانیں لیکن یہ کوئی مداخلت نہیں ہے۔
