امریکہ چین تجارتی کشیدگی : خواتین کی ٹی وی پر ’جنگ‘

اگرچہ چین اور امریکہ کے درمیان تجارتی معاہدے پر بات چیت معطل ہے لیکن دونوں ممالک کے درمیان لفظی گولہ باری میں تیزی آرہی ہے اور اس دوران چین اور امریکہ کی دو خواتین ٹی وی اینکرز ایک غیر معمولی ٹی وی مباحثے کے لیے تیار ہو گئی ہیں۔

چین کے انگریزی سرکاری چینل سی جی ٹی این اور امریکی ٹی وی فاکس بزنس کی خواتین اینکرز نے حال ہی میں چین اور امریکہ کے درمیان تجارتی جنگ کے حوالے سے ٹی وی پر براہ راست مباحثہ کرنے کا فیصلہ کیا ہے۔

براہ راست ڈیبیٹ یا مباحثے کے لیے آمادہ ہونے سے قبل دونوں اینکرز کے درمیان سوشل میڈیا پر لفظی جنگ اور الزامات کا تبادلہ ہوا۔

ان خواتین کے درمیان لفظی جنگ کی شروعات اس وقت ہوئی جب سی جی ٹی این پر ’دی پوائنٹ‘ شو کی میزبان لیو ژن نے ٹرش ریگن کے پرائم ٹائم شو میں چین کے حوالے سے تبصرے کا برا منایا۔

جب ٹرش ریگن نے الزام لگایا کہ چین سالانہ امریکہ سے چھ سو بلین ڈالرز انٹیلکچول پراپرٹی رائٹس کی مد میں چوری کرتا ہے تو لیو نے انہیں’معاشی جنگی جنون پھیلانے‘ پر شدید تنقید کی۔

ٹرش ریگن نے فوری طور پر اپنے شو میں لیو کو جواب دیتے ہوئے کہا کہ چائنیز امریکہ کے خلاف مکمل انفارمیشن وار لڑ رہے ہیں اور ان کے تازہ ترین ٹارگٹ وہ (ریگن) ہے۔

ٹرش نے ٹویٹر پر لیو کو چیلینج کیا کہ وہ ان کے ساتھ تجارت کے مسئلے دیانت درانہ ڈیبیٹ کریں۔ لیو نے ٹرش کا چیلنج قبول کرتے ہوئے کہا کہ وہ کیچڑ اچھالنے کا کھیل نہیں کھیلنا چاہتیں۔

براہ راست ڈیبیٹ بدھ کو طے ہوئی ہے اور اس کے لیے  لیو ٹرش ریگن کے فاکس نیوز پر ہونے والے شو میں شریک ہوں گی۔ 

چین  کے ذرائع ابلاغ نے اس مباحثے میں دلچسپی کو بڑھاوا دیا ہے۔ چین کی حکمران کمیونسٹ پارٹی کے ترجمان اخبار پیپلز ڈیلی نے اس ڈیبیٹ کے حوالے سے اپنے سوشل میڈیا میں ذکر کیا ہے اور گوبل ٹائمز اخبار نے بھی اپنے ایک آرٹیکل میں بدھ کو ہونے والی اس ڈیبیٹ کا ذکر کیا ہے۔

چین میں اس حوالے سے دلچسپی کا یہ عالم ہے کہ چین کے وزارت خارجہ کے ترجمان نے اپنی معمول کی بریفنگ کے دوران بھی اس کا ذکر کیا۔

ترجمان لوکانگ نے کہا کہ ’مجھے بھی دوسروں کی طرح اس ڈیبیٹ میں دلچسپی ہے۔ امید ہے کہ ہر کوئی اسے دیکھے گا۔‘

تاہم ابھی تک یہ واضح نہیں کہ چین میں اس ڈیبیٹ کو براہ راست دکھایا جائے گا یا نہیں۔

ٹرش ریگن کی فاکس نیوز پر موجود بائیوگرافی کے مطابق وہ کونسل آن فارن ریلیشن کی ممبر اور کولمبیا یونیورسٹی کی گریجویٹ ہیں۔ جبکہ لیو نے اپنے کیرئیر کا آغاز 1996 میں انگریزی بولنے کے ایک عالمی مقابلے میں کامیابی سے کیا تھا۔

چونکہ دونوں خواتین کے درمیان ڈیبیٹ کی تاریخ طے ہو چکی ہے اس لیے چین میں لیو کے 1996 کے ’انٹرنیشنل پبلک سپیکنگ کمپٹیشن ان انگلش‘ کا ایک کلپ سوشل میڈیا پر دھڑا دھڑ شئیر ہو رہا ہے۔