سعودی عرب کے مختلف شہروں اور علاقوں میں جمعہ کو گردو غبار کا طوفان اور بارش کی اطلاعات ہیں۔ مکہ مکرمہ، مدینہ منورہ ، ینبع اور العیص میں موسلا دھار بارش ہوئی ہے۔
الجوف، شمالی حدود ریجن اور تبوک کے مختلف مقامات پر بھی بارش ہوئی۔جدہ میں جمعہ کی صبح مطلع آبر آلود رہا تاہم رات کو بعض علاقوں میں گرج چمک کے ساتھ بارش ہوئی جس سے سڑ کیں زیر آب آگئیں ۔
عاجل ویب سائٹ کے مطابق مکہ مکرمہ میں بعض مقامات پر موسلا دھار اور مکہ جدہ شاہراہ پر درمیانے درجے کی بارش ریکارڈ کی گئی۔
وزارت داخلہ کے ماتحت نیشنل سیکیورٹی آپریشن سینٹر نے بتایا کہ بارش سے قبل مکہ جدہ شاہراہ اور مکہ مکرمہ میں مختلف مقامات پر گردو غبار کا شدید طوفان چھایا رہا۔ حد نگاہ محدود ہوگئی تھی۔
نیشنل سینٹر نے سعودی شہریوں اور مقیم غیر ملکیوں سے کہا کہ وہ بارش کے دوران اختیار کی جانے والی تدابیر کی پابندی کریں۔
ماہر موسمیات سامی الحربی نے توقع ظاہر کی کہ بارش کا سلسلہ بدھ تک جاری رہے گا۔ ایک او رماہر موسمیات عبدالعزیز الحصینی نے بتایا کہ آئندہ 36گھنٹوں کے دوران سعودی عرب کے متعدد علاقوں میں بارش ہوگی۔ بعض مقامات پر ژالہ باری بھی متوقع ہے۔
مکہ مکرمہ، مدینہ منورہ، الجوف ، الشمالیہ ، تبوک، القصیم، حائل ، باحہ، عسیر ، جازان، شمالی ریاض اور الشرقیہ کے مغربی علاقوں میں جمعہ اور ہفتے کی درمیانی شب بارش کا سلسلہ جاری رہے گا۔
موسمیات کے تجزیہ نگار محمد التمیمی نے بتایا کہ ہفتے سے شمالی حدود، الجوف اور حائل میں موسلا دھار بارشیں ہوں گی۔ آئندہ ہفتے کے وسط میں ان کا سلسلہ مکہ، ریاض، قصیم اور الشرقیہ تک پہنچ جائے گا۔
سبق ویب سائٹ کے مطابق مدینہ منورہ ریجن میں کہیں بوندا باندی اور کہیں زیادہ بارش ہوئی ہے ۔منگل سے بارش کا سلسلہ جاری ہے۔
