کورونا: لیڈی ریڈنگ ہسپتال پشاور کا گائنی یونٹ بند

لیڈی ریڈنگ ہسپتال پشاور کے شعبہ گائنی کو منگل 5 مئی سے دو ہفتے کے لیے بند کر دیا گیا ہے ۔

حکام کے مطابق یہ فیصلہ گائنی یونٹ کے 35 ڈاکٹروں, نرسوں اور دیگر سٹاف کا کورونا وائرس کا ٹیسٹ مثبت آنے پر کیا گیا ہے۔

اس حوالے سے ہسپتال کے چیف ایگزیکٹو آفیسر پروفیسر ڈاکٹر عبداللطیف خان کی جانب سے صوبائی سیکرٹری صحت امتیاز حسین شاہ کو ایک بھی خط لکھا گیا ہے۔

خط میں کہا گیا ہے کہ 'ہمارا سٹاف مستقل طور پر کورونا وائرس کا سامنا کر رہا ہے اور اس شعبے کے کئی ارکان وائرس کا شکار ہو چکے ہیں۔ 

چیف ایگزیکٹو آفیسر کے مطابق 'اس صورت حال میں ہم سارے سٹاف ممبرز کی سکریننگ کر رہے ہیں۔ ابھی ہمارے عملے کے 100 سے زائد افراد کے ٹیسٹ کے نتائج آنا باقی ہیں جن کے نمونے خیبر میڈیکل یونیورسٹی کو بھجوا دیے گئے ہیں۔'

خط میں مزید کہا گیا ہے کہ 'اس عرصے کے دوران عمارت میں سپرے کیا جائے گا اور عملے کو قرنطینہ میں رکھا جائے گا جبکہ باقی ارکان کی بھی سکریننگ کی جائے گی۔'

لیڈی ریڈنگ ہسپتال پشاور کے چیف ایگزیکٹو آفیسر نے شعبہ گائنی میں آنے والوں سے گزارش کی ہے کہ وہ اس عرصے کے دوران دیگر قریبی ہسپتالوں سے رجوع کریں۔   

یاد رہے کہ حال ہی میں کیے گئے ٹیسٹ میں شعبہ گائنی کی ایک اسسٹنٹ پروفیسر، 14 ٹی ایم اوز، تین ہاوس آفیسرز، دو ہیڈ نرسز، آیا اور سویپرز کے ٹیسٹ مثبت آئے ہیں۔