ریاض سے ایک اور خصو صی پرواز، 250 پاکستانیوں کی واپسی
ریاض سے ایک اور خصو صی پرواز، 250 پاکستانیوں کی واپسی
ہفتہ 6 جون 2020 19:50
سفیر پاکستان مسافروں کو الوداع کہنے کے لیے ائیر پورٹ پر موجود تھے۔(فوٹو ٹوئٹر)
سعودی عرب سے پاکستانیوں کی واپسی جاری ہے۔ ہفتے کو پاکستان انٹرنیشنل ایئر لائنز(پی آئی اے ) کی ایک اور پرواز ریاض سے 250 مسافروں کو لے کرپشاور روانہ ہوگئی۔
پشاور جانے والی پرواز سے 20 میتیں بھی بھیجی گئی ہیں۔ 2 جون کو پشاور جانے والی پرواز سے سولہ پاکستانیوں کی میتیں بھیجی گئی تھیں۔
سفیر پاکستان راجہ اعجاز اور کمیونٹی ویلفیئر اتاشی مسافروں کو الوداع کہنے کے لیے ائیر پورٹ پر موجود تھے۔
اس سے قبل منگل 2 جون کو ریاض سے ملتان جانے والی پی آئی اے کی دو پروازوں میں 140، 140 اور پشاور جانے والی خصوصی پرواز کے ذریعے 250 مسافر سعودی عرب سے پاکستان گئے تھے۔
یاد رہے کہ حکومت پاکستان نے کورونا وائرس کی وبا کے باعث سعودی عرب سے واپس آنے کی خواہشمند پاکستانیوں کی وطن واپسی کے لیے خصوصی پروازوں کا سلسلہ شروع کیا ہے۔
اب تک جدہ سے آٹھ پروازوں کے ذریعے 1700 جبکہ ریاض سے نو پروازوں کے ذریعے 1684 پاکستانی واپس جا چکے ہیں۔ دمام سے بھی خصوصی پرواز کے ذریعے پاکستانی واپس گئے ہیں۔
ریاض سے نو پروازوں کے ذریعے 1684 پاکستانی واپس جا چکے ہیں۔(فوٹو ٹوئٹر)
یاد رہے کہ ریاض میں سفارتخانہ پاکستان اور جدہ میں پاکستان قونصلیٹ پی آئی اے کے عملے کے تعاون سے سعودی عرب سے پاکستانیوں کی بحفاظت وطن واپسی کے انتظامات کررہے ہیں۔
سعودی عرب میں اس وقت ہزاروں پاکستانی وطن واپسی کے خواہشمند ہیں جن میں سے بیشتر وزٹ یا بزنس ویزے پر آئے تھے یا ان کا خروج نہائی لگا تھا اور وہ سفری پابندیوں کے باعث واپس نہیں جا سکے تھے۔
