90 فیصد سے زیادہ مریض صحت یاب ہوچکے ہیں۔(فوٹو سبق)
سعودی عرب میں کورونا وائرس کے نئے کیسز میں مسلسل ریکارڈ کمی ہورہی ہے۔
جمعے کو مسلسل دوسرے دن 600 سے کم نئے مریض سامنے آئے۔ 90 فیصد سے زیادہ مریض صحت یاب ہوچکے ہیں۔
وزارت صحت کے مطابق جمعہ 18 ستمبر کو گذشتہ 24 گھنٹوں کے دوران 576 نئے مریض سامنے آئے۔ اس طرح متاثرین کی تعداد بڑھ کر 3 لاکھ 28 ہزار 720 ہو گئی ہے۔
سبق نیوز نے وزارت صحت کی جانب سے جاری اعداد و شمار کے حوالے سے بتایا کہ گذشتہ 24 گھنٹوں کے دوران ایک ہزار 145 افراد صحت یاب ہوئے ہیں۔ اب تک 3 لاکھ 8 ہزار 352 افراد اس مرض سے شفایاب ہو چکے ہیں۔
گذشتہ 24 گھنٹوں کے دوران ایک ہزار 145 افراد صحت یاب ہوئے ہیں۔(فوٹو ایس پی اے)
وزارت صحت کا کہنا ہے کہ گذشتہ روز کورونا سے 31 افراد ہلاک ہوئے۔ اموات کی مجموعی تعداد چار ہزار 430 ہو چکی ہے۔
مملکت میں اس وقت ایکٹیو کیسز کی تعداد 15 ہزار 938 ہے جن میں سے ایک ہزار 189 مریض انتہائی نگہداشت یونٹ میں زیرعلاج ہیں۔
گذشتہ 24 گھنٹوں کے دوران مختلف شہروں میں کورونا وائرس کے نئے کیسز کی سب سے زیادہ تعداد مکہ میں رہی جہاں 58 نئے مریض سامنے آئے ہیں۔
جدہ میں 52، ریاض 35، الھفوف47، دمام 37، مدینہ 33، المبرز 24، خمیس مشیط 19، ابہا 15، جازان 14، نجران 14، بلجرشی 13 اور حائل میں 10 کیسز کا پتا چلا ہے۔
وبا کو پھیلنے سے روکنے کے لیے حفاظتی اقدامات کا سلسلہ جاری ہے۔(فوٹو ایس پی اے)
اعداد و شمار کے مطابق 20 شہروں میں مریضوں کی تعداد ایک، ایک، 9 شہروں میں 2، 2 اور 6 شہروں میں 3،3 جبکہ 13 شہروں میں 4،4 افراد میں کورونا وائرس کی تصدیق ہوئی ہے۔
سعودی عرب میں متعدی امراض سے بچاؤ اور وبا کو پھیلنے سے روکنے کے لیے حفاظتی اقدامات کا سلسلہ جاری ہے۔
وزارت صحت کے ترجمان نے کہا ہے کہ پچھلے ایک ماہ سے کورونا کے کیسز میں مسلسل کمی آرہی ہے۔
ترجمان کا کہنا تھا کہ کورونا کے کیسز میں کمی کے حوالے سے اب تک تمام اشارے امید افزا ہیں۔
