’حزب اللہ کیمیائی مواد ذخیرہ کر رہا ہے‘

امریکی سٹیٹ ڈیپارٹمنٹ کے ایک سینیئر اہلکار نے الزام لگایا ہے کہ حزب اللہ تنظیم کے ممبران نے یورپ کے مختلف شہروں میں کیمیائی مواد ذخیرہ کر رکھا ہے جو مختلف یورپی شہروں میں دھماکوں کے لیے استعمال کیا جا سکتا ہے

خبر رساں ادارے اے پی کے مطابق سٹیٹ ڈیپارٹمنٹ کے اہلکار نے یورپی ممالک سمیت دوسرے ملکوں سے بھی حزب اللہ پر پابندی لگانے کی اپیل کی۔

سٹیٹ ڈیپارٹمنٹ کے کاؤنٹرٹیرارزم کے کوارڈینیٹر نیتھن سیلز کا مزید کہنا تھا کہ حزب اللہ کے لیے کام کرنے والوں نے حالیہ سالوں کے دوران امونیئم نائٹریٹ بیلجیئم سے فرانس، یونان، اٹلی، سپین اور سوئٹزرلینڈ تک پہنچایا جبکہ اب بھی یورپ بھر میں یہ سلسلہ جاری ہے۔

امونیئم نائٹریٹ ایک ایسا کیمییکل ہے جو عام طور پر کھاد بنانے لیے استعمال ہوتا ہے لیکن اس کو دھماکہ خیز مواد کے لیے استعمال کیا جا سکتا ہے۔ اس کا ذخیرہ کرکے رکھے جانا بھی بہت خطرناک ہے جیسا کہ پچھلے ماہ لبنان کے دارالحکومت بیروت میں ہوا۔

سیلز نے بغیر کوئی ثبوت پیش کرتے ہوئے کہا کہ امریکہ کو یقین ہے کہ ایران کی پشت پناہی رکھنے والی حزب اللہ سے وابستہ عناصر 2012 سے امونیئم نائٹریٹ فرسٹ ایڈ کٹس میں یورپ بھر میں لے جاتے رہے۔

’امریکہ کو یقین ہے کہ یہ سامان اب بھی یورپ بھر میں موجود ہے ممکنہ طور پر یونان، اٹلی اور سپین میں۔‘

’حزب اللہ یورپ میں امونیئم نائٹریٹ کیوں ذخیرہ کرے گی‘ اس سوال پر ان کا کہنا تھا ’جواب واضح ہے، حزب اللہ نے یہ چیزیں رکھی ہوئی ہیں جو اس وقت بڑے دہشت گردی واقعات کے لیے استعمال کی جا سکتی ہیں جب تہران میں موجود اس کے آقاؤں کی طرف سے اشارہ کیا جائے گا۔‘

سیلز نے یہ باتیں ایک آف لائن فورم میں بتائیں جس کا اہتمام امریکن جیوئش کمیٹی کی جانب سے کیا گیا تھا۔ کمیٹی نے دیگر ممالک سے بھی مطالبہ کیا کہ وہ حزب اللہ پر پابندی لگائیں۔

امریکہ نے حزب اللہ کو 1997 سے غیر ملکی دہشت گرد تنظیم قرار دے رکھا ہے لیکن کچھ ممالک اس کے فوجی ونگ اور سیاسی ونگ میں فرق تصور کرتے ہیں۔

یورپی یونین نے ایران کے حمایت یافتہ حزب اللہ کے ملٹری ونگ کو کالعدم دہشت گرد گروہ کی فہرست میں شامل کیا ہے تاہم سیاسی ونگ کو نہیں، جو پچھلے کچھ سالوں کے دوران لبنانی حکومت کا حصہ رہا ہے۔

کچھ ممالک انفرادی طور پر جن میں جرمنی اور یو کے شامل ہیں، نے اس کو مکمل طور پر کالعدم قرار دیا ہے۔ سیلز کا کہنا ہے کہ دیگر ممالک کو بھی ایسا کرنا چاہیے۔

’حزب اللہ ایک اکائی ہے جو جنگجو یا نام نہاد سیاسی ونگز میں کبھی تقسیم نہیں ہو سکتی، مکمل پابندی نہ ہونے  کے باعث گروپ اب بھی اپنے مالی اور کام کے ذرائع بڑھا رہا ہے۔‘ سیلز نے دو ٹوک الفاظ میں کہا، ’حزب اللہ ایک ہی تنظیم ہے، یہ ایک دہشت گرد تنظیم ہے۔‘