پنجاب کے صوبائی وزیر کی ’ارتھ آور کی انوکھی تعریف‘ سوشل میڈیا پر وائرل

دنیا بھر کی طرح پاکستان میں بھی 22 اپریل کو یوم ارض یا ارتھ ڈے منایا جا رہا ہے۔ ایسے میں سوشل میڈیا پر جہاں ’ارتھ ڈے‘ ٹریند کر رہا ہے وہیں مختلف شعبہ ہائے زندگی سے تعلق رکھنے والے افراد اپنے اپنے انداز میں ماحول کو درپیش خطرات اور محفوظ ماحول کی اہمیت پر گفتگو کر رہے ہیں۔

اس دوران سوشل ٹائم لائنز پر پنجاب کے صوبائی وزیر برائے ثقافت اور کالونیز میاں خیال احمد کاسترو کی ایک مختصر ویڈیو وائرل ہوئی ہے جس میں وہ ’ارتھ آور‘ کی تعریف کرتے دکھائی دیتے ہیں۔

ویڈیو میں میڈیا سے گفتگو کرتے ہوئے خیال احمد کاسترو بتاتے ہیں کہ ’ارتھ آور یہ ہے کہ دنیا میں کہیں بھی ارتھ آتا ہے تو اسے روکنے کے لیے سبزہ کام کرتا ہے، درخت کام کرتے ہیں۔ آپ کے ہر ارتھ کو روکتے ہیں، ہر زلزلے کو روکتے ہیں تو ہم نے اسے روکنا ہے اور اسے گرین کرنا ہے‘۔

ویڈیو نئی ہے یا پرانی کی بحث میں پڑے بغیر سوشل میڈیا صارفین نے خیال احمد کاسترو کے الفاظ کو دلچسپ پایا تو کہیں غلط تعریف کرنے پر انہیں تنقید کا نشانہ بنایا گیا، کہیں لوگ اپنی لاعلمی کا اعتراف کرتے رہے۔

صوبائی وزیر کے حلقہ نیابت سے واقف ایک ٹویپ نے ان کی انتخابی کامیابی کے بعد وزارت ملنے کی یادیں تازہ کیں تو لکھا ’جناب نے وزیر بننے کے بعد فیصل آباد کا کوئی کھمبا نہیں چھوڑا جہاں بینر نہ لگائے ہوں‘۔

فیصل آباد سے صوبائی اسمبلی کے حلقے پی پی 110 سے رکن اسمبلی منتخب ہونے والے میاں خیال احمد کاسترو کا تعلق حکمراں جماعت پی ٹی آئی سے ہے۔