مسجد الحرام اور مسجد نبوی میں دنیا کا جدید ترین ساؤنڈ سسٹم

سعودی عرب کی مقدس مساجد کی انتظامیہ مسجد الحرام مکہ مکرمہ اور مسجد نبوی مدینہ  منورہ میں دنیا کا جدید ترین ساؤنڈ سسٹم استعمال کررہی ہے۔ موذن کی اذان، آئمہ کی تلاوت اور خطیبوں کے خطبات کی آواز ایک ایک گوشے میں متوازن اور مناسب طریقے سے  پہنچتی ہے۔ 

سعودی خبررساں ادارے ایس پی اے کے مطابق انتظامیہ میں مینٹیننس سسٹم کے ڈائریکٹر محسن السلمی نے بتایا کہ مسجد الحرام میں نصب ساؤنڈ سسٹم دنیا کا سب سے بڑا سب سے شفاف اور سب سے معیاری ہے۔ 

السلمی نے بتایا کہ مسجد الحرام سے منسلک مطاف کا صحن، توسیعی حصے، صفا اور مروہ کے درمیان سعی کا علاقہ، داخلی خارجی صحن اور آس پاس کی سڑکوں تک صاف شفاف متوازن انداز میں نماز، اذان، خطبے اور وعظ کی آواز پہنچانا بڑا چیلنج ہے۔ چیلنج کا پہلو یہ ہے کہ بعض مقامات کھلے ہیں اور بعض بند ہیں۔ بعض کا کچھ حصہ کھلا اور کچھ بند ہے۔

علاوہ ازیں تمام آئمہ کی آواز کا لیول ایک جیسا نہیں۔ نماز، طواف، سعی اور زیارت کے لیے آنے والوں کی تعداد کبھی کم، کبھی زیادہ اور کبھی بہت زیادہ ہوتی ہے۔ ان تمام عناصر کو مدنظر رکھ کر ہر جگہ موزوں انداز میں شفاف طریقے سے آواز پہنچائی جاتی ہے۔  

حرم شریف کے کسی بھی حصے میں موجود کسی بھی شخص کو یہ احساس نہیں ہوتا کہ وہ ساؤنڈ سسٹم سینٹر میں موجود انسان سے مختلف یا کم درجے میں اذان یا نماز یا خطبے کی آواز سن رہا ہے۔ 

انہوں نے بتایا کہ مسجد الحرام میں یو پی ایس یونٹ سسٹم نصب کیا گیا ہے۔ یہ آواز کو آلات اور سپیکرز کے ساتھ بہتر شکل میں پہنچانے کا اہتمام کرتا ہے۔ کرنٹ منقطع ہونے کی صورت میں بھی آواز کا لیول متاثر نہیں ہوتا۔ 

 مسجد الحرام، صحنوں اور اطراف کی سڑکوں پر لگ بھگ 7500 سپیکرز نصب ہیں۔ یہ مختلف پاور اور حجم کے ہیں۔ انہیں ساؤنڈ سسٹم کے ماتحت ٹیکنیکل روم کے ذریعے کنٹرول کیا جاتا ہے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں