امارات میں کورونا کے مزید 3 لاکھ کے قریب ٹیسٹ، نئے کیسز ایک ہزار سے کم

متحدہ عرب امارات میں کورونا کے نئے کیسز جمعہ 3 ستمبر کو بھی ایک ہزار سے کم سامنے آئے ہیں۔ پچھلے چوبیس گھنٹے میں 978 نئے مریضوں کی تصدیق ہوئی ہے۔

نئے مریض مختلف قومیت سے ہیں، ان سب کی حالت مستحکم ہے اور انہیں ضروری علاج فراہم کیا جارہا ہے۔

امارات کی سرکاری کی خبر رساں ایجنسی’ وام ‘نے وزارت صحت کے حوالے سے بتایا’ متاثرین کی تعداد بڑھ کر 7 لاکھ 21 ہزار 308 ہوگئی ہے‘۔

وزارت صحت کے مطابق پچھلے چوبیس گھنٹے کے دوران جدید تشخیصی آلات کی مدد سے کورونا کے مزید 3 لاکھ 99 ہزار 936 ٹیسٹ کیے گئے۔

بیان میں کہا گیا کہ زیرعلاج مریضوں میں سے مزید ایک مریض چل بسا، مرنے والوں کی تعداد دو ہزار 44 ہوگئی۔

 وزارت نے عوام کو احتیاطی تدابیر اور سماجی فاصلے کی پابندی جاری رکھنے کی پھر ہدایت کی ہے۔

بیان میں کہا گیا کہ متاثرہ مریضوں میں سے مزید ایک ہزار 504 مکمل صحتیاب ہوگئے۔ صحتیاب ہونے والوں کی تعداد بڑھ کر 7 لاکھ 9 ہزار 659 ہوگئی۔

علاوہ ازیں وزارت صحت کے مطابق پچھلے چوبیس گھنٹے میں کورونا ویکسین کی مزید 50 ہزار 20 خوراکیں دی گئی ہیں۔ اب تک ویکسین کی ایک کروڑ 83 لاکھ 55 ہزار 2228 خوراکیں دی جا چکی ہیں۔

بیان میں کہا گیا کہ’ امارات کی 88.08 فیصد آبادی کو ویکسین کی پہلی خوراک جبکہ 77.05 فیصد کو ویکسین کی دونوں خوراکیں دی جا چکی ہیں‘۔