’حقانی پشتون قبیلہ ہے‘، عمران خان کے ’انکشاف‘ پر سوشل میڈیا پر بحث

بدھ کے روز وزیراعظم عمران خان نے امریکی نیوز چینل سی این این کو ایک انٹرویو کے دوران بتایا کہ ’امریکیوں نے کبھی بھی نہیں سمجھا کہ حقانی نیٹ ورک ہے کیا۔‘

انہوں نے سی این این کی اینکر پرسن بیکی اینڈرسن کو بتایا کہ ’حقانی ایک قبیلہ ہے۔ یہ ایک پشتون قبیلہ ہے جو افغانستان میں رہتا ہے۔ 40 سال قبل جب افغان جہاد شروع ہوا ہمارے پاس 50 لاکھ افغان پناہ گزین تھے اور ان میں سے کچھ حقانی تھے۔‘

ان کا دعویٰ تھا کہ امریکہ ان سے مطالبہ کررہا تھا کہ ’پناہ گزینوں کے کیمپوں، جہاں 30 لاکھ لوگ رہ رہے ہیں، میں دیکھیں ان میں سے کون طالبان ہے اور کون نہیں۔‘

وزیراعظم عمران خان نے اپنے انٹرویو میں کئی اہم موضوعات پر گفتگو کی لیکن سوشل میڈیا پر ان کی حقانی نیٹ ورک کے حوالے سے کی گئی گفتگو زیر بحث ہے۔

معروف پاکستانی صحافی حامد میر نے اپنی ٹویٹ میں لکھا کہ ’میں نے ابھی وزیراعظم عمران خان کو کہتے ہوئے سنا کہ حقانی ایک قبیلہ ہے۔‘

’یہ ایک قبیلہ نہیں ہے۔ دارالعلوم حقانیہ اکوڑہ خٹک کے تمام طلبہ بشمول جلال الدین حقانی جنہوں نے افغانستان میں سوویت یونین کی شکست میں اہم کردار ادا کیا وہ خود کو حقانی کہتے ہیں۔‘

دنیا بھر میں شدت پسند گروہوں پر گہری نظر رکھنے والے محقق عبدالسید نے ایک ٹویٹ میں کہا کہ ’جلال الدین حقانی 1970 میں جامعہ حقانیہ اکوڑہ خٹک سے پڑھ کر نکلے تھے اور حقانی نام انہوں نے وہیں سے لیا ہے۔‘

ان کا مزید کہنا ہے کہ ’جلال الدین حقانی افغان صوبے پکتیا کے زادران قبیلے کی ذیلی شاخ سلطان زئی سے تعلق رکھتے تھے۔‘

اسماعیل خان نے لکھا کہ ’وزیراعظم عمران خان نے سی این این کو بتایا کہ حقانی افغانستان میں ایک قبیلہ ہے، جو کہ نہیں ہے۔‘

’وہ شاید کہنا چاہ رہے تھے کہ حقانی افغان ہیں۔‘

حقانی نیٹ ورک کے بانی جلال الدین حقانی افغان صوبے پکتیا کے ضلع زادران میں 1939 میں پیدا ہوئے تھے۔ حقانیوں پر لکھی گئی مشہور کتاب ’فاؤنٹین ہیڈ آف جہاد‘ کے مطابق جلال الدین حقانی کا تعلق زادران قبیلے کی سلطان خیل شاخ سے ہے۔

ان کے بھائی خلیل اور بیٹا سراج الدین حقانی موجودہ افغان حکومت میں اہم ذمہ داریوں پر فائز ہیں۔

سراج الدین حقانی افغانستان کے وزیر داخلہ ہونے کے ساتھ ساتھ طالبان سے منسلک حقانی نیٹ ورک کے موجودہ سربراہ بھی ہیں۔