نیوزی لینڈ کرکٹ ٹیم آئندہ سال پاکستان کا دورہ کرے گی

نیوزی لینڈ کرکٹ ٹیم آئندہ سال دسمبر میں اور جنوری میں دو ٹیسٹ اور تین ون ڈے انٹرنیشنل میچز کھیلنے کے لیے پاکستان کا دورہ کرے گی۔

پیر کو پاکستان کرکٹ بورڈ نے ایک بیان میں کہا ہے کہ نیوزی لینڈ کرکٹ ٹیم اپریل 2023 میں ایک مرتبہ پھر پاکستان آئے گی جہاں وہ پانچ ایک روزہ اور پانچ ٹی 20 میچز پر مشتمل سیریز کھیلے گی۔

پاکستان کرکٹ بورڈ کے چیئرمین رمیز راجہ کی نیوزی لینڈ کرکٹ کے چیئرمین مارٹن سینیڈن سے ملاقاتوں کے دوران ان دوروں کو حتمی شکل دی گئی۔

نیوزی لینڈ کرکٹ ٹیم کے پہلے دورہ پاکستان میں شامل دو ٹیسٹ اور تین ون ڈے انٹرنیشنل میچز بالترتیب آئی سی سی ورلڈ ٹیسٹ چیمپئن شپ اور آئی سی سی مینز کرکٹ ورلڈ کپ سپر لیگ کا حصہ ہوں گے۔

دوسرے دورے میں مہمان ٹیم کو پانچ ون ڈے اور پانچ ٹی 20 انٹرنیشنل میچز کھیلنے ہیں۔

دونوں بورڈز اب دورے کی تاریخوں کو حتمی شکل دیں گے۔

رمیز راجہ کا کہنا ہے کہ ’وہ مارٹن سینیڈن اور ان کے بورڈ کے شکر گزار ہیں۔ وہ ان سے ہونی والی ملاقاتوں کے نتائج پر بھی بہت خوش ہیں۔‘

انہوں نے کہا کہ یہ دونوں بورڈز کے مضبوط تعلقات کی ضمانت اور اس بات کی تصدیق ہے کہ پاکستان کرکٹ برادری کا ایک اہم رکن ہے۔

نیوزی لینڈ کرکٹ کے چیف ایگزیکٹو ڈیوڈ وائٹ کا کہنا ہے کہ رمیز راجہ اور مارٹن سینیڈن کی دبئی میں نتیجہ خیز اور تعمیری گفتگو ہوئی، جس سے دونوں بورڈز کے تعلقات بھی مزید مضبوط ہوئے ہیں۔

اب پاکستان مارچ 2022 سے اپریل 2023 کے دوران آسٹریلیا، انگلینڈ اور نیوزی لینڈ کے خلاف آٹھ ٹیسٹ، 11 ون ڈے اور 13 ٹی 20 میچز کی میزبانی کرے گا۔

واضح رہے کہ ستمبر میں نیوزی لینڈ نے پہلے ون ڈے انٹرنیشنل سے چند لمحات قبل سکیورٹی وجوہات کی بنا پر دورہ منسوخ کرنے کا یکطرفہ فیصلہ کیا تھا اور ٹیم کوئی میچ کھیلے بغیر روانہ ہوگئی تھی۔