چیمپیئنز ٹرافی ، تربیتی کیمپ برمنگھم میں لگے گا، انضمام

لاہور... مشن چیمپئنز ٹرافی میں حریفوں کو قابو کرنے کیلئے منصوبے بننے لگے جبکہ15رکنی اسکواڈ میں کسی تبدیلی کا امکان نہیں۔ چیمپئنز ٹرافی کا یکم جون سے انگلینڈ میں آغاز ہوگا۔ پاکستان کیلئے یہ ایونٹ خاص اہمیت کا حامل ہے۔ بہتر کارکردگی گرین شرٹس کی ورلڈ کپ2019 ءمیں براہ راست شرکت کا راستہ بنا دے گی۔ رواں سال ستمبر تک عالمی ون ڈے رینکنگ میں آٹھویں پوزیشن برقرار رکھنا ضروری ہے۔ چیف سلیکٹر انضمام الحق نے ایک انٹرویو میں بتایا کہ میگا ایونٹ کی تیاری کیلئے 10روزہ تربیتی کیمپ برمنگھم میں لگایا جائے گا۔ اس وقت ون ڈے ٹیم کے کھلاڑی ٹکڑوں میں بٹے ہوئے ہیں۔ان میں سے چند ویسٹ انڈیز کی قطعی مختلف کنڈیشنز میں ٹیسٹ سیریز کھیل رہے ہیں۔ دیگر پاکستان سے جائیں گے۔برمنگھم میں تربیتی کیمپ کے دوران ان کو ایک ساتھ ٹریننگ اور ہم آہنگی کا موقع ملے گا۔ انھوں نے کہا کہ انگلینڈ کی کنڈیشنز پاکستان ٹیم کیلئے ہمیشہ مشکل ہوتی ہیں، وہاں ٹریننگ کیلئے وقت ملنے پر کھلاڑیوں کو ماحول سے مطابقت میں مدد ملے گی۔انضمام الحق نے تصدیق کی کہ چیمپئنز ٹرافی کیلئے قبل ازیں اعلان کردہ 15رکنی اسکواڈ میں کوئی تبدیلی نہیں کی جائے گی۔