حکومت پی ٹی آئی کو دہشت گرد جماعت کے طور پر ڈیل کرے: مریم نواز

پاکستان مسلم لیگ ن کی سینیئر نائب صدر اور چیف آرگنائزر مریم نواز نے کہا ہے کہ حکومت پی ٹی آئی کو ’عسکری اور دہشت گرد‘ جماعت کے طور پر ڈیل کرے۔

جمعے کو پارٹی سیکرٹریٹ ماڈل ٹاون میں پریس کانفرنس کرتے ہوئے انہوں نے کہا کہ زمان پارک میں جو ہوا، ملک کی 75 سالہ تاریخ میں کسی سیاسی جماعت نے ایسا نہیں کیا۔

مریم نواز نے زمان پارک میں پولیس اور پی ٹی آئی کارکنوں کے درمیان جھڑپوں کے حوالے سے کہا کہ ایسا پہلی بار ہوا کہ سیاسی جماعت کہلانے والی جماعت اور اس کے لیڈر نے جو حرکتیں کیں، وہ میں نے ملکی تاریخ میں کبھی نہیں دیکھیں۔

انہوں نے کہا کہ سیاسی و جماعتیں اپنے مقاصد کے لیے پھانسیاں، جیلیں اور جلاوطنی کاٹتی ہیں۔

’انہوں (پی ٹی آئی) نے پولیس، ریاست پر دھاوا بولا، جو ریاست کے خلاف بغاوت ہے۔ 2014 سے یہی کچھ ہو رہا ہے۔ اِنہوں نے شاہراہ دستور پر قبریں کھودیں اور ریاست کا مذاق اڑایا۔ پی ٹی وی، پارلیمان پر حملہ کیا، بلوں کو جلایا۔‘

’جسٹس کھوسہ کی باقیات آج بھی سہولت کاری کر رہی ہیں‘

مسلم لیگ ن کی سینیئر نائب صدر کا کہنا تھا کہ پہلے یہ چیزیں چھپی ہوئی تھیں کیونکہ سرپرست اور سہولت کار اس وقت موجود تھے۔

’یہ جسٹس کھوسہ کی عدالت میں روز ٹانگ پر ٹانگ رکھ کر بیٹھا ہوتا ہے اور اشتہاری ہوتا تھا لیکن اسے کوئی گرفتار نہیں کرتا تھا۔ جسٹس کھوسہ نے نواز شریف کو جن الفاظ سے پکارا، وہ ذرا دیکھیں کہ گاڈ فادر اور سیسیلیئن مافیا کون ہے اور کیسا ہوتا ہے۔ آج بھی ان کی باقیات موجود ہیں اور سہولت کاری کر رہی ہیں۔‘

مریم نواز نے کہا کہ رحیم یار خان کے کچے کے علاقے اور زمان پارک میں ہونے والے آپریشن میں کیا فرق ہے؟ وہاں ڈاکو پولیس کو پیچھے دھکیل دیتے ہیں اور زمان پارک میں بھی ایسا ہی ہو رہا ہے۔

’زمان پارک میں کالعدم تنظیم کے کارندوں کے ذریعے پولیس کے خلاف کارروائیاں کی جا رہی ہیں۔‘

انہوں نے عمران خان پر الزام عائد کیا کہ دہشت گرد غاروں میں بیٹھ کر احکامات دیتے تھے اور یہ زمان پارک کے اندر سے بیٹھ کر ’پٹرول بم پھینکنے کے احکامات‘ دیتا رہا۔

’فوج جنرل ریٹائرڈ باجوہ کے خلاف خود کارروائی کرے‘

مریم نواز نے ایک سوال کے جواب میں کہا کہ ’جنرل ریٹائرڈ باجوہ نے جو کچھ کیا اس کا وہ اعتراف کر چکے۔ وہ ادارے کی بدنامی کا باعث بنے ہیں اس لیے وہ (فوج) ان کے خلاف خود کارروائی کرے۔‘

انہوں نے کہا کہ نواز شریف نے جنرل ریٹائرڈ باجوہ اور لیفٹننٹ جنرل ریٹائرڈ فیض حمید کے نام ان کے عہدوں پر ہوتے ہوئے لیے تھے، لیکن عمران خان، جنرل باجوہ کی تعریفیں کرتے رہے اور عہدے سے ہٹنے پر ان کے کورٹ مارشل کا مطالبہ کیا۔