نامناسب رویہ، ہرمن پریت کور پر بنگلہ دیشی کپتان برس پڑیں

انڈیا اور بنگلہ دیش کی ویمن ٹیمز کے درمیان کھیلی گئی تین ون ڈے میچز کی سیریز 1-1 سے برابر ہو گئی جس کے بعد دونوں ٹیموں کو مشترکہ طور سیریز کا فاتح ٹھہرایا گیا ہے۔

دونوں ٹیموں کے درمیان سیریز کا تیسرا میچ سنیچر کو میرپور ڈھاکہ میں کھیلا گیا، جس میں انڈیا نے میزبان ٹیم کی جانب سے دیے گئے 226 رنز کے ہدف کے جواب میں 49.3 اوورز میں آل آؤٹ ہو کر 225 رنز بنائے۔

تیسرے ون ڈے میں گمبھیر صورتحال تب دیکھنے میں آئی جب انڈین ویمن ٹیم کی کپتان ہرمنپریت کور نے ناہیدہ اختر کی گیند پر آوٹ کے بعد غصے میں آ کر وکٹوں کو بیٹ مار دیا۔

صرف یہی نہیں، ہرمنپریت کور نے میچ ختم ہونے کے بعد تقریب تقسیم انعامات میں ان فیلڈ امپائر پر شدید تنقید کی۔

اس کے بعد جب دونوں ٹیموں کے درمیان ٹرافی شیئر کرنے کا وقت آیا تو انہوں نے منتظمین سے طنزیہ انداز میں امپائروں کو بھی ٹرافی اٹھانے کے لیے بلانے کا کہا جس پر بنگلہ دیش کپتان نگار سلطانہ کو یہ بات سخت ناگوار گزری اور وہ اپنی ٹیم کو وہاں سے لے کر ڈریسنگ روم چلی گئیں۔

اس کے علاوہ ہرمنپریت کور کو تقریب کے دوران طنزیہ انداز میں ہنستے ہوئے اور مذاق اڑاتے ہوئے بھی دیکھا گیا۔

اس صورتحال پر بنگلہ دیشی کپتان نگار سلطانہ پھٹ پڑیں۔

این ڈی ٹی وی کے مطابق بنگلہ دیشی کپتان نے کہا کہ ’یہ صرف اور صرف اُن (ہرمنپریت کور) کا مسئلہ ہے۔ میرا اس سے کچھ لینا دینا نہیں ہے۔‘

انہوں نے مزید کہا کہ ’بطور کھلاڑی، انہیں بہتر رویہ رکھنا چاہیے تھا۔ میں آپ کو نہیں بتا سکتی کہ وہاں کیا ہوا لیکن مجھے میری ٹیم کے ساتھ وہاں رکنا اچھا نہیں لگا۔ وہاں ماحول ٹھیک نہیں تھا۔ اس وجہ سے ہم واپس آگئیں۔ کرکٹ عزت اور نظم و ضبط کا کھیل ہے۔‘

امپائر کی جانب سے انڈین کپتان کو آوٹ دینے پر نگار کہتی ہیں کہ ’اگر وہ آوٹ نہ ہوتیں تو امپائر انہیں آوٹ نہ دیتے۔ ہمارے امپائر مین کرکٹ سے آئے تھے لہذا وہ اچھے امپائر تھے۔ امپائر کا فیصلہ حتمی ہوتا ہے چاہے آپ اسے تسلیم کریں یا نہ کریں۔‘

خیال رہے کہ انڈیا اور بنگلہ دیش کی خواتین ٹیم کے درمیان کھیلی گئی تین ون ڈے میچز کی سیریز کے پہلے میچ میں بنگلہ دیش کو 40 رنز سے جیت حاصل ہوئی تھی جبکہ دوسرا میچ انڈیا نے 108 رنز سے اپنے نام کیا تھا۔