مزید یوٹرن بھی لیں گے؟ ’ہاں لیتا رہوں گا‘، عمران خان

 پاکستان تحریک انصاف کے چیئرمین عمران خان نے کہا ہے کہ جب کوئی غلطی ہی نہیں کی تو الیکشن کمیشن سے معافی کیوں مانگیں؟ 

منگل کو چیئرمین تحریک انصاف عمران خان توہین الیکشن کیس میں الیکشن کمیشن آف پاکستان میں پیش ہوئے تو اس موقع پر انہوں نے صحافیوں سے غیر رسمی گفتگو کی۔

عمران خان الیکشن کمیشن کے کمرہ عدالت میں پہنچے تو انہوں نے فرنٹ نشست پر بیٹھتے ساتھ ہی پینے کے لیے پانی مانگا، جس پر وکلاء نے انہیں پانی مہیا کیا۔  

عمران خان کے ہمراہ ان کے وکیل شعیب شاہین، فیصل چوہدری، نعیم پنجوتھہ، علی بخاری سمیت دیگر وکلاء بھی موجود تھے۔ 

توہین الیکشن کمیشن کیس کی سماعت نثار درانی کی سربراہی میں چار رکنی بینچ نے کی۔

کیس کی سماعت ختم ہوئی تو عمران خان نے صحافیوں کے سوالوں کے جواب دیے۔

ایک صحافی نے تبصرہ کرتے ہوئے کہا ’خان صاحب لگتا ہے آپ آدھے وکیل بن گئے ہیں‘ جس پر عمران خان کا کہنا تھا ’اتنے کیسز ہو گئے ہیں اب تو پورا وکیل بن گیا ہوں۔‘

عمران خان نے مزید کہا ’اتنے کیسز میں پیش ہوا ہوں اب سارا معاملہ سمجھ گیا ہوں۔‘

ایک اور صحافی نے سابق وزیراعظم سے پوچھا کہ کیا وہ الیکشن کمیشن سے معافی مانگیں گے؟

اس پر عمران خان نے صحافی سے واپس سوال کیا، ’آپ کا کیا خیال ہے مجھے معافی مانگنی چاہیے،‘ اور ساتھ ہی تبصرہ کیا ’جب میں نے کوئی غلطی کی ہی نہیں تو معافی کیوں مانگوں؟‘

صحافی نے عمران خان سے پوچھا کہ کیا وہ مزید یوٹرن بھی لیں گے؟

عمران خان نے زور دے کر کہا ’ہاں یوٹرن لیتا رہوں گا۔‘

خیال رہے کہ الیکشن کمیشن نے پیر کو عمران خان کے وارنٹ گرفتاری جاری کیے تھے۔

‏گفتگو کے دوران عمران خان نے توہینِ الیکشن کمیشن کیس میں فواد چودھری کے بیان کی تردید کر دی۔

فواد چودھری نے الیکشن کمیشن سے غیر مشروط معافی مانگتے ہوئے کہا تھا کہ انہوں نے جو زبان الیکشن کمیشن کے خلاف استعمال کی وہ بطور ترجمان تحریک انصاف پارٹی کی ہدایات پر استعمال کی تھی۔ 

عمران خان سے سوال ہوا کہ کیا آپ اور آپ کی پارٹی نے فواد چودھری کو الیکشن کمیشن کے خلاف ایسی زبان استعمال کرنے کے لیے کہا تھا؟ عمران خان نے جواب دیا ’وہ تو آپ فواد چودھری سے پوچھیں۔ مجھے تو یہ بھی نہیں پتہ انہوں نے کونسی زبان استعمال کی تھی؟‘

فواد چودھری عمران خان کی آمد سے کچھ دیر پہلے ہی الیکشن کمیشن سے روانہ ہو گئے تھے۔

سماعت کے دوران عمران خان کے وکیل ایڈووکیٹ شعیب شاہین نے مبر نثار درانی سے اگلی سماعت کے لیے ستمبر کی کوئی تاریخ دینے کی درخواست کی۔ 

ممبر نثار درانی نے کہا کہ 2 اگست کو چیئرمین پی ٹی آئی پر فرد جرم عائد کریں گے، آئندہ سماعت پر بھی چیئرمین پی ٹی آئی ذاتی حیثیت میں پیش ہوں۔

کیس کی سماعت 2 اگست تک ملتوی کر دی گئی۔