غیرملکی ٹرک سعودی علاقوں میں کارگو سروس کے مجاز نہیں

سعودی عرب میں ٹرانسپورٹ جنرل اتھارٹی کے ترجمان صالح الزوید نے کہا ہے کہ غیرملکی ٹرکوں کو مملکت کے مختلف علاقوں میں کارگو کی سہولت فراہم کرنے کا حق نہیں۔

الاخباریہ چینل سے گفتگو میں الزوید نے کہا کہ ٹرانسپورٹ جنرل اتھارٹی نے غیرملکی ٹرکوں کے حوالے سے انتظامی ضوابط مقرر کیے ہیں۔

الزوید نے کہا کہ مملکت آنے والے غیرملکی ٹرکوں کو مقررہ پوائنٹ تک سامان پہنچانے کا حق حاصل ہوتا ہے اس کے بعد ان کی ذمہ داری ہے کہ وہ جس ملک سے آئے تھے اس ملک واپس چلے جائیں۔ وہ سعودی عرب کے ایک شہر سے دوسرے شہر سامان منتقل کرنے کے مجاز نہیں ہیں۔

یاد رہے کہ ٹرانسپورٹ جنرل اتھارٹی یہ پابندی سعودی ٹرکوں کے درمیان مقابلے کے مواقع بہتر بنانے اور سرکاری و نجی اداروں کو سہولت فراہم کرنے کی غرض سے لگائے ہوئے ہے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں