انڈیا کے ویزے تاحال نہیں ملے، پاکستان کرکٹ ٹیم کی دبئی روانگی میں تاخیر

انڈین ہائی کمیشن سے ویزے جاری نہ ہونے کے باعث پاکستان کی ٹیم کرکٹ ورلڈ کپ سے قبل دبئی کے لیے روانہ نہ ہو سکی۔

ویب سائٹ کرک انفو کے مطابق پاکستان کے کھلاڑیوں نے ورلڈ کپ سے قبل ’ٹیم بانڈنگ ٹرپ‘ پر دبئی جانا تھا۔

پاکستان کرکٹ ٹیم تاحال انڈیا جانے کے لیے ویزوں کا انتظار کر رہی ہے۔

پاکستانی سکواڈ کو اگلے ہفتے کے اوائل میں متحدہ عرب امارات جانا تھا اور 29 ستمبر کو نیوزی لینڈ کے خلاف اپنے پہلے وارم اپ میچ کے لیے حیدر آباد روانہ ہونے سے پہلے کچھ دن قیام کرنا تھا۔

اب پاکستان کرکٹ ٹیم اگلے بدھ کو لاہور سے دبئی جائے گی اور کھلاڑی وہاں سے حیدرآباد کے لیے پرواز کریں گے۔ اگرچہ ایک اہلکار نے کہا کہ صورتحال ’تشویشناک‘ ہے لیکن ایسا لگتا ہے کہ انڈیا کے سفر کے لیے ویزے وقت پر مل جائیں گے۔

کرک انفو کے مطابق خیال کیا جاتا ہے کہ ویزوں کی درخواست ایک ہفتہ قبل دی گئی تھی۔

ویب سائٹ کے مطابق کرکٹ ورلڈ کپ کے لیے انڈیا جانے والی نو ٹیموں میں سے پاکستان واحد ہے جس کے کھلاڑیوں کو ابھی تک ویزے کے لیے انتظار کرنا پڑ رہا ہے۔

یہ تاخیر اس پیچیدہ اور کشیدہ سیاسی پس منظر کو اجاگر کرتی ہے جس کے دوران پاکستانی ٹیم انڈیا کا سفر کر رہی ہے۔ اطراف کے شہریوں کے لیے دونوں ممالک کے درمیان سفر انتہائی محدود ہے کیونکہ ویزا حاصل کرنا ایک مشکل اور اکثر بے نتیجہ عمل ہے۔

کرکٹ کھیلنے کے لیے بھی سرحد کے آر پار جانا اب ایک انتہائی کم نظر آنے والا منظر ہے۔

سنہ 2012 میں وائٹ بال سیریز کے لیے پاکستان کے انڈیا کے دورے کے بعد سے کسی بھی ٹیم نے دو طرفہ سیریز کے لیے دوسرے ملک کا سفر نہیں کیا۔

نومبر 2008 میں ممبئی حملوں کے بعد سے دونوں ممالک کے درمیان تعلقات میں مسلسل تناؤ اور کشیدگی ہے۔

حال ہی میں کھیلے گئے ایشیا کپ جس کی میزبانی پاکستان کر رہا تھا انڈیا کی ٹیم نے آنے سے انکار کیا تھا جس کے بعد کچھ میچز سری لنکا منتقل کیے گئے۔